Vekas viktigaste: Dødeleg snøfall, grense på gløtt og eit kongehus i krise

Marius Borg Høiby i retten

Rettssaka mot Marius Borg Høiby (29), son til kronprinsesse Mette-Marit, starta i Oslo tingrett denne veka.

Han er tiltalt for 38 lovbrot, mellom anna fire valdtekter (tre av dei utan samleie), grov kroppskrenking, mishandling i nære relasjonar, trugslar, grovt narkotikalovbrot og køyring utan gyldig førarkort. Høiby erkjenner straffskuld for nokre av tiltalepunkta, men nektar skuld for dei mest alvorlege lovbrota.

I det eine tilfellet av valdtekt utan samleie, som har vore tema i retten denne veka, har han hevda at kvinna samtykka til sex, medan kvinna sjølv hevdar at ho var utan medvit og kanskje neddopa.

Eit enormt, internasjonalt pressekorps har møtt opp til rettssaka. Høiby har i rettssalen kritisert pressa for å «trakassere» og «forfølge» han. Prinsesse Ingrid Alexandra gjekk torsdag ut på sin private Instagram-konto og spurde «Når er det nok?».

Les også: Anna (18) og Marthe (18) er i salen under rettssaka mot Høiby

30 døde etter ekstremt snøfall i Japan

Minst 30 menneske er døde etter to veker med veldig snøvêr i Japan, melder The New York Times.

Menneske har vorte nedgravne av snø i heimane sine, utsette for dødelege uhell eller vorte stranda medan dei var på reise, skriv avisa.

Den japanske rikskringkastaren NHK fortel om ein mann i 60-åra som døydde då huset hans kollapsa under vekta av snøen. Ein annan stad vart ei 91 år gammal kvinne funnen gravlagd under snøen med ein spade i nærleiken.

Dei japanske styresmaktene opplyser at over 200 menneske har vorte skadde og har åtvara mot takras og huskollapsar.

Snøvêret kjem i forkant av sundagens val til Representantanes hus i Japan, og det er varsla om meir snø i helga.

Vekas lyspunkt: Ein månad utan dødeleg skyting i Sverige

Svenske Expressen og Aftonbladet melder at ingen har vorte drepne av skotskadar i Sverige i januar.

Det er første månad på åtte år utan dødeleg våpenvald.

Sidan 2018 har 382 personar vorte drepne med skytevåpen i Sverige. I 2024 og 2025 vart 44 menneske drepne i året.

– Det har vore ein minkande trend, seier kriminolog Manne Gerell til Aftonbladet.

Han peiker på at både den noverande og den førre regjeringa, så vel som politiet, har teke kraftige grep med gjengkriminaliteten.

– Eg trur, med trykk på trur, at det faktum at ein har tatt mange av toppane utanlands, kan spele inn. Dei har finansiert mange av dei konfliktane som har rasa i Sverige, og mange av dei har vorte tatt det siste året, seier han.