Vekas viktigaste: Korrupsjon, demonstrasjonar og BBC-søksmål

Trump saksøker BBC

BBC har dei siste dagane fått kritikk for dokumentaren Panorama, som dei gav ut i 2024.

I dokumentaren har dei sett saman to sitat frå ein tale Donald Trump heldt før storminga av Kongressen i 2021. Det fekk det til å sjå ut som han eggja opp tilhengjarane sine på ein måte han ikkje gjorde.

NRK Supernytt har òg endra eit innslag dei har laga, der dei har gjort ei liknande klipping i talen til Trump.

Det kvite hus har no saksøkt BBC. I programmet The Ingraham Angle på Fox News sa han at «Eg trur eg må [saksøke dei]», og heldt fram: «Dei endra talen min frå 6. januar, som var ein nydeleg tale, som var ein veldig roande tale, og dei fekk han til å høyrast radikal ut».

BBC har sendt eit personleg brev til presidenten for å beklage. Kritikken kjem etter at eit notat frå BBC vart leke, der dei er bekymra for korleis dei redigerte klippet, og at det kan få konsekvensar.

Nav-direktøren går av

Hans Christian Holte trekker seg som Nav-direktør, skriv NRK. Riksrevisjonen, som har i oppgåve å kontrollere at statens pengar blir brukt på ein forsvarleg måte, har kome fram til at Nav ikkje har hatt god nok internkontroll og loggføring.

– Dette må Nav rette opp i snarast, sa riksrevisor Karl Eirik Schjøtt-Pedersen på ein pressekonferanse på tysdag.

Arbeids- og inkluderingsminister Kjersti Stenseng (Ap) seier ho ikkje lenger har tillit til Holte som leiar, og det er etter samtalar mellom dei at Holte no går av.

Holte seier at han ikkje kan gjere anna enn å trekke seg, men at han gjerne skulle ha halde fram som leiar.

FN vil etterforske det som skal vere massedrap etter protestar i Tanzania

Tysdag bad FN om at det blir starta ei etterforsking av det som skal vere drap på hundrevis av menneske etter demonstrasjonane som braut laus etter presidentvalet førre månad.

Ønsket om ei etterforsking kom etter at myndigheitene i Tanzania sikta fleire hundre menneske for forræderi etter demonstrasjonane.

Politiet i Tanzania har sendt ut ein arrestordre på fleire av leiarane i opposisjonen, som enda ikkje er pågripne. Sikkerheitsstyrkar skal òg ha frakta bort drepne demonstrantar frå likhus til ukjente stader.

Leiar for menneskerettar i FN, Volker Türk, ber om at regjeringa no frigir kroppane til familiane, slik at dei kan bli gravlagde.