Dette betyr statsbudsjettet for deg som ung

Grunnskule

Regjeringa har sett av 35 millionar kroner for å jobba mot mobbing og betra skulemiljøet.

I tillegg er det sett av pengar til innkjøp av utstyr til norske klasserom, som til dømes mikroskop, sløydbenkar, symaskinar og anna naudsynt utstyr.

Vidare kuttar regjeringa i støtta til privatskular. Sjå kor mykje i faktaboksen under.

Vidaregåande skule og fråfall

Regjeringa aukar både bortebuarstipendet og utstyrsstipendet for elevar i den vidaregåande skulen.

For dei som fell utanfor skule og utdanning har regjeringa sett av meir pengar til ungdomsgarantien frå NAV, som skal sikra særskilt oppfølging av unge i alderen 16-30 år.

Forsking og høgare utdanning

Regjeringa aukar studiestøtta med 3,8 prosent frå 2024-2025, som er prisveksten dei legg opp til.

Det inneber 5200 kroner meir årleg, og 472 kroner i månaden.

Regjeringa har òg sett av store summar til forsking på kunstig intelligens, bygging av NTNU sin nye campus i Trondheim og fleire LIS1-stillingar (tidlegare turnusstillingar) for legar, som var eit av kutta som fekk kritikk i fjor.

Helse og omsorg

Regjeringa aukar eigendelen på behandlingar hjå lege, psykolog, fysioterapi og poliklinikk. På den andre sida set dei av 150 millionar kroner til å styrka lågterskeltilbod for psykisk helse.

Regjeringa vil òg auka avgiftene på tobakk og alkohol, der snusavgifta aukar mest.