Klimaaktivistar vann fram i høgsteretten – Tyskland må skjerpa klimalova

– Effektivt klimavern må bli implementert no og ikkje om ti år, når det er for seint.

Det sa Sophie Backsen (22) etter å ha fått medhald i retten, ifølgje nyheitsbyrået Reuters.

Ho er oppvaksen på ein bondegard på øya Pellworm, utfor kysten av Tyskland, og fryktar for framtida med auka havnivå.

• Les også: Den franske staten tapte klimasøksmål – må betala éin euro

Må skjerpa krava etter 2030

Søksmålet er ført av ni privatpersonar, men støtta av miljøorganisasjonar som Greenpeace og Fridays for Future-rørsla, som no kan jubla over sigeren.

Tyskland må endre klimalova si innan utgangen av 2022 for å få ned utsleppa til nesten null innan 2050, vedtok retten.

Ifølgje vedtaket er ikkje den tyske klimalova frå 2019 tilstrekkeleg når det kjem til utsleppskutt etter 2030.

I Noreg enda eit liknande søksmål med tap i Høgsterett, som meinte at staten ikkje braut Grunnlova når dei opna for meir oljeboring.

• Les også: Tapte klimasøksmålet: – Høgsterett sviktar dagens unge

– Epokegjerande

I ei Twitter-melding kallar Tysklands finansminister Peter Altmaier det ei viktig avgjerd.

– Det er epokegjerande for klimavernet og rettane til unge. Og det skapar sikkerheit for økonomien, skriv han.

Das @BVerfG hat heute ein großes & bedeutendes Urteil erlassen. Es ist epochal für Klimaschutz & Rechte der jungen Menschen. Und sorgt for Planungssicherheit für die Wirtschaft.

— Peter Altmaier (@peteraltmaier) April 29, 2021