Comeback og omrokering – bli kjent med dei nye statsrådane
Jonas Gahr Støre gjer endringar i regjeringskabalen. Sjå CV-ane til dei nye statsrådane!
– Snart trer Stortinget saman igjen. Vi skal legge fram statsbudsjett og det skal forhandlast og få fleirtal i Stortinget. Det er noko av bakgrunnen til at eg har gjort endring i regjering i dag, seier statsminister Jonas Gahr Støre (Ap) på ein pressekonferanse tysdag føremiddag.
Støre informerte kl. 10 i ekstraordinært statsråd om endringane som blir gjort i regjeringa etter stortingsvalet.
Det var to kjente arbeidarpartiprofilar Støre hadde med seg på Slottsplassen: Kjersti Stenseng (51) og Bjørnar Skjæran (59).
Bjørnar Skjæran, som har vore parlamentarisk leiar, blir no ny kommunalminister. Tidlegare kommunalminister Kjersti Stenseng tar over som arbeids- og inkluderingsminister.
Dette er arbeidarpartiregjeringa per september 2025:
Statsminister Jonas Gahr Støre (Ap)
Finansminister Jens Stoltenberg (Ap)
Arbeids- og inkluderingsminister Kjersti Stenseng (Ap)
Helse- og omsorgsminister Jan Christian Vestre (Ap)
Utanriksminister Espen Barth Eide (Ap)
Samferdselsminister Jon-Ivar Nygård (Ap)
Energiminister Terje Aasland (Ap)
Kultur- og likestillingsminister Lubna Jaffery (Ap)
Digitaliserings- og forvaltingsminister Karianne Oldernes Tung (Ap)
Næringsminister Cecilie Myrseth (Ap)
Kunnskapsminister Kari Nessa Nordtun (Ap)
Klima- og miljøminister Andreas Bjelland Eriksen (Ap)
Fiskeri- og havminister Marianne Sivertsen Næss (Ap)
Forsvarsminister Tore O. Sandvik (Ap)
Justis- og beredskapsminister Astri Aas-Hansen (Ap)
Kommunal- og distriktsminister Bjørnar Skjæran (Ap)
Forskings- og høgare utdanningsminister Sigrun Aasland (Ap)
Utviklingsminister Åsmund Grøver Aukrust (Ap)
Framtida.no har tidlegare presentert CV-ane til regjeringa etter valet i 2021 og då Arbeidarpartiet presenterte ny regjering i vinter. Her har vi oppdatert dei nye statsrådane sine CV-ar:
Brenna til Stortinget
Tonje Brenna (37), som har vore arbeids- og inkluderingsminister sidan 16. oktober 2023, blir no parlamentarisk leiar for Arbeidarpartiet.
Den parlamentariske leiaren er leiar for stortingsrepresentantane til partiet.
– Den samla tyngda som Tonje har, som nestleiar, statsråd, brei erfaring frå forhandlingar, erfaring frå lokal- og fylkespolitikken, og som ein del av Utøya-generasjonen, så trengst ho no til å leie an i dei mange forhandlignane som skal vere i Stortinget den komande perioden, sa Støre på pressekonferansen.
Støre sa i Politisk kvarter på NRK at rolla som parlamentarisk leiar blir svært viktig no, fordi Arbeidarpartiet må ha støtte frå Sosialistisk Venstreparti, Raudt, Senterpartiet og MDG for å få fleirtal i Stortinget.
