Greenpeace og Natur og Ungdom vann over staten i Høgsterett
Høgsterett meiner lagmannsretten har tolka lova feil, og sender spørsmålet om miljørørsla kan krevja mellombels oljestenging tilbake for ny behandling.
– Anken har ført fram. Föreningen Greenpeace Norden og Natur og Ungdom har vunne saka, skriv Høgsterett i avgjerda si fredag.
Lagmannsretten hadde lagt til grunn – ut frå overordna samfunnsomsyn – at han ikkje hadde kompetanse til å komma kravet i møte om mellombels åtgjerd, sidan det var snakk om klimagassutslepp frå petroleumsutvinning, skriv Høgsterett.
Den øvste domstolen i landet har med det komme til at dette er feil lovtolking og opphevar rettsavgjerda og sender han tilbake til lagmannsretten for ny behandling.
Samtidig blir staten dømd til å betala sakskostnadene til miljøorganisasjonane på 1,66 millionar kroner.
Saka er ein del av Greenpeace og Natur og Ungdoms klimasøksmål mot staten. Dei har bede om mellombels stans i verksemda på petroleumsfeltane Breidablikk, Tyrving og Yggdrasil i Nordsjøen fram til spørsmålet om løyva til å driva oljeutvinning på dei tre felta er endeleg avgjord i rettssystemet.
Vil hindra utslepp av klimagassar
Miljøorganisasjonane fekk medhald i tingretten, men det gjekk motsett veg då Borgarting lagmannsrett behandla anken frå staten i fjor haust.
Spørsmålet dreier seg om løyva til å driva oljeutvinning på dei tre felta var rette, og om domstolen kunne avseia ei såkalla mellombels åtgjerd til alle spørsmål var avklarte. Formålet var å hindra utslepp av klimagassar og CO2 og dermed akselerera global oppvarming.
Borgarting lagmannsrett meinte han ikkje var i stand til å prøva spørsmålet eller oppfylla krava som var stilte, og peika mot politikarane i Stortinget.
– Konklusjonen i lagmannsretten er at skrankar som gjeld for prøvelsesretten til domstolane og demokratiomsyn tilseier at åtgjerd ikkje kan vedtakast, står det i rettsavgjerda, som kom 14. oktober i fjor.
Tek ikkje stilling til sjølve søksmålet
Høgsterett starta behandlinga si av spørsmålet 18. og 19. mars. Dei har ikkje teke stilling til om løyva er ugyldige, eller om det er nødvendig å gripa inn.
Dei ber likevel no lagmannsretten om å leggja til grunn mellom anna at dei ikkje kan byggja avgjerda si på at dei har avgrensa kompetanse til å komma til ei avgjerd om mellombels åtgjerd.
