– Tenkjer veldig mykje på fusk
Over halvparten av norske studentar er redde for å bli tatt i fusk. Studentorganisasjonen ber om nasjonale retningslinjer.
– Eg går rundt og tenkjer veldig mykje på fusk, seier student Tiril Werring ved UiB til Khrono.
Det har ho til felles med minst annankvar student, ifølgje ei meiningsmåling utført av Sentio på vegner av Norsk studentorganisasjon (NSO) og Khrono.
Der svarer 53 prosent at dei er bekymra for å bli tekne for juks på eksamen eller ei oppgåve utan å ha juksa med vilje.
I same undersøking seier ein av fem at regelverket for fusk og juksing på deira studiestad ikkje er enkelt å forstå.
Ein av grunnane til at studentane fryktar å bli tekne i juks, er at kunstig intelligens (KI) for alvor har komme inn på lesesalane til studentane – og at retningslinjene til universiteta for bruk av kunstig intelligens heng litt etter.
– Det er vanskeleg å vite kvar grensene går med KI. Det har det ikkje vore snakka om så mykje på studiet vårt, seier medstudent Hanna Høegh.
Leiar av Norsk studentorganisasjon (NSO) Kaja Ingdal Hovdenak meiner det er eit stort problem at utdanningsinstitusjonane ikkje har eit samordna fuskeregelverk og ber om nasjonale retningslinjer.
– Vi ønskjer at styresmaktene også tek ordentleg tak i tematikken for å sikre rettstryggleiken til studentane.
