Lågare karaktersnitt for avgangselevane i grunnskulen
Avgangselevane i grunnskulen har i år i gjennomsnitt 42,2 grunnskulepoeng. Det er ein liten nedgang frå fjoråret, men snittet er høgare enn før pandemien.
Det viser tal frå Utdanningsdirektoratet.
Karaktersnittet for avgangselevane er i år 0,2 poeng lågare enn det var for elevane som gjekk ut av grunnskulen i fjor. Dermed held fjorårsnedgangen i grunnskulepoeng fram, sjølv om nedgangen er mykje mindre i år.
Jenter har høgare snitt enn gutar
– Vi ser at karakterane går noko ned samanlikna med åra under og etter pandemien. Vi veit ikkje heilt kva dette kjem av, men det kan vere ei normalisering etter pandemiåra, der vi såg at standpunktkarakterane gjekk opp sjølv om andre undersøkingar har vist at læringsresultata gjekk ned i same perioden, seier avdelingsleiar for statistikk og dataforvaltning Irene Hilleren.
Karaktersnittet er likevel litt høgare enn det var før pandemien.
Som tidlegare år har jentene høgare snitt enn gutane. Karaktersnittet til jentene er i år på 44,3 grunnskulepoeng, samanlikna med 40,3 for gutane. Fordelt på fylke er karaktersnittet høgast i Oslo og lågast i Finnmark.
Stadig fleire manglar vurderingsgrunnlag
Tala frå Utdanningsdirektoratet viser også at stadig fleire elevar manglar vurderingsgrunnlag i eitt eller fleire fag. I norsk hovudmål har til dømes andelen elevar som ikkje får vurderingsgrunnlag, auka frå 1,8 til 3,1 prosent dei siste fem åra.
Auka skulefråvær kan, ifølgje direktoratet, vere ei årsak.
– Det er urovekkjande at stadig fleire elevar ikkje har grunnlag for vurdering når dei går ut av grunnskulen. Det er viktig å snu utviklinga vi ser med auka fråvær, seier Hilleren.
Det har også vore ein auke i andelen elevar som har fritak frå karakterar i norsk sidemål. Den auka frå 21 prosent i fjor til 23 prosent i år.
