Vekas viktigaste: Leiarar kjem og leiarar går

Hamas har vald ny leiar

Etter at den førre Hamas-leiaren Ismail Haniyeh vart drepen, tilsynelatande i eit israelsk luftangrep mot Iran-hovudstaden Teheran førre veke, har Hamas no vald ein ny leiar.

Yahya Sinwar vert peikt på som hjernen bak angrepet mot Israel 7. oktober. Han vart fødd i Gaza og har vore medlem av Hamas sidan dei tidlege dagane til organisasjonen.

Han har eit brutalt rykte og har bore kallenamnet «slaktaren frå Khan Younis», og det er venta at han kjem til å føre ei hardare line overfor Israel enn kva forgjengaren hans gjorde. Fleire fryktar at han vil ta Hamas i ei meir ytterleggåande retning, noko som kan gjere fredsforhandlingar vanskelegare.

Antirasistar tok til motmæle i Storbritannia

Etter at ein 17 år gammal gut vart arrestert for å ha drepe tre unge jenter med kniv ved ein danseskule i Southport i England, har det vore store, valdelege opptøyar fleire stader i landet.

Opptøyane har i stor grad vore rasistisk motiverte, etter at falske rykte om at gjerningsmannen var ein radikal islamistisk båtflyktning, vart spreidde av figurar på ytre høgre. Dermed har både moskéar og hotell som husar flyktningar vore særleg utsette. Fleire opprørarar har no blitt dømde til opp mot tre år i fengsel.

Etter fleire dagar med hærverk har opprørarane vorte møtte med store motdemonstrasjonar frå antirasistar som har teke til gatene i fleire byar, mellom anna i London, Bristol og Newcastle. Motdemonstrasjonane har i stor grad gått roleg føre seg, og mot-demonstrantane har gjort det klart at flyktningar er velkomne i Storbritannia.

Vekas lyspunkt: Første norske tikamp-gull og første norske kvinne i 400 meter-finale

Det har ikkje vore det beste OL-et for Noreg enn så lenge, men nokre store bragder kan vi likevel rope hurra for.

21 år gamle Henriette Jæger vart den første norske kvinna som nokosinne har teke seg til OL-finalen i 400 meter, då ho med mikroskopiske marginar kom seg vidare frå semifinalen. Ho får ein tøff kamp mot verdseliten i finalen fredag kveld.

Sundag tok dessutan det 22 år gamle stjerneskotet Markus Rooth ein imponerande gullmedalje og ny norsk rekord i tikamp.

Denne veka har gulldraumen broste for fleire av dei norske medaljehåpa i OL. Jakob Ingebrigtsen sprang inn til ein skuffande 4.-plass i 1500-meter tysdag, med Narve Gilje Nordås fleire plassar bak. Herrelaget i handball tapte mot Slovenia onsdag kveld, og volleyball-herrane Anders Mol og Christian Sørum tapte semifinalen mot Tyskland.

På den lyse sida har både Jakob Ingebrigtsen og Narve Gilje Nordås kvalifisert seg til finalen i 5000 meter laurdag. Karsten Warholm er ein av favorittane i fredagens finale i 400 meter hekk etter ein sterk semifinale, og handballkvinnene skal spele finale mot Frankrike laurdag.