Første titt på Squid Game-realityprogrammet er her

Ikkje liv og død

Squid Game er ein koreansk serie der 456 personar set livet på spel for å vinne ein stor pengepremie. I serien blir deltakarane eliminert på ekte, altså drepne, når dei ryk ut av konkurransen.

Det slepp heldigvis dei 456 deltakarane i realityversjonen unna. Som i originalserien skal deltakarar frå heile verda prøve seg på utfordringar like dei i serien, og dessutan nokre nye.

Sjølv om det ikkje er med livet som innsats, er det mykje som står på spel. Ein heldig vinnar får nemleg med seg premiepotten på 4,56 millionar dollar. Det svarar til nesten 50 millionar kroner.

Netflix opplyser at det er den største premien i reality-TV-historia, ifølgje Variety.

– Gjennom ein serie konkurransar vil kvar deltakar bli testa til yttergrensene sine og tvungen til å spørje seg sjølv kor langt ein er villig til å gå for å vinne, med opportunistiske alliansar, grufulle strategiar og svik, skriv Netflix vidare om innhaldet i serien.

Frå «Squid Games: The Challenge». Foto: Netflix

Problematisk innspeling

Det har likevel ikkje berre vore fryd og gammen under innspelinga av Squid Game: The Challenge. Det har blitt rapportert om problem under innspelinga på starten av året. Deltakarar skal ha blitt skadde på grunn av kuldegradar på settet i ein flyhangar. Det har òg kome påstandar om at serien er rigga, skriv Gizmodo.

Produksjonsselskapa Studio Lambert og The Garden svarte ifølgje Variety at dei er svært opptekne av helsa og tryggleiken til deltakarane og produksjonen og at påstandane om fiksing er usanne.