Leiaren i Humanistisk Ungdom vil fjerne stigma rundt gaming
– Som dotter av ein austeuropear og med eit ikkje-norsk namn har eg både sett og opplevd korleis minoritetar blir behandla i arenaer frå jobb til sosialliv, og meiner det er på tide med ei kulturendring.
Kristina Elizabete Timermane Williamson er ny leiar av Humanistisk Ungdom. 21-åringen frå Stavanger drøymer om eit samfunn som gir alle moglegheit til å vere den dei vil og utvikle eigen identitet i eit trygt fellesskap. Ho meiner sosiale klassar og økonomi ikkje skal stoppe nokon frå å oppnå det dei vil, særleg innanfor utdanning.
Hjartesaka hennar er minoritetar sine rettar.
– Mi andre, litt mindre seriøse hjartesak, er at eg meiner at rosiner ikkje burde blandast inn i bakverk!
Må lære seg å styre tida
Humanistisk Ungdom-leiaren opplevde i 16-17-årsalderen at hjernen hennar «skrudde seg på», og ho vart klar over at det var mykje feil i samfunnet.
– Det første skikkelege politiske standpunktet eg tok må ha vore under abortlovsaka i 2018, og eg meiner den dag i dag at abortlova ikkje skal rørast om det har negative konsekvensar for kvinners reproduktive helse. Sidan då har eg delteke på mange ulike felt, både i lokalpolitikken, interessepolitikken og studentpolitikken.
Kristina Elizabete Timermane Williamson vart rørt då ho blei vald til ny leiar av Humanistisk Ungdom på landsmøtet tidlegare i år. Foto: Iver Daaland Åse
Williamson skildrar seg sjølv som ein ganske jordnær type, og ønsker at alle skal ha moglegheit til å føle eigarskap til organisasjon ho leier.
Ho ser opp til Christian Lomsdalen, leiaren av Human-Etisk Forbund, som ho meiner har meir enn 24 timar i eit døgn.
– Time-management er noko eg framleis må lære meg.
- Les også meiningsinnlegget Kristina Williamson skreiv om sosiale medium: «Vi får beskjed om å berre sletta, blokkera, ta kontakt med dei vaksne»
Kristina Elizabete Timermane Williamson leier Humanistisk Ungdom framover. Foto: Privat
Vil fjerne gaming-stigma
Det neste året skal Humanistisk Ungdom fokusere på kritisk tenking og kjeldekritikk, Gud og sex i skulen, og å gjere religions- og livssynsminoritetar synlege i debatten.
Williamson synest det er ekstra spanande at Humanistisk Ungdom har vedtatt ei fråsegn om destigmatisering av gaming.
– Det er utruleg mykje bra med hobbyen som ikkje kjem fram i lyset, og det er på tide at det blir framsnakka i staden for å bli baksnakka!
– Kva er den neste kampen?
– Det blir å halde fram å setje søkelyset på religionsfridom for alle, i heile verda!
Humanistisk Ungdom-leiaren vil helst ha ein halvfeit og lat svart pus. Ho likar ikkje insekt, og føretrekker difor New York. Illustrasjon: Framtida.no via Canva
Storfan av Nytt på Nytt
På fritida likar Kristina Elizabete Timermane Williamson å spele videospel og sylte grønsaker.
– Helst begge delar samstundes, og det er det eg har Stardew Valley til!
Kristina Elizabete Timermane Williamson fotografert i samband med Humanistisk Ungdoms Vinterseminar Februar 2023 på Tonsenhagen Skole i Oslo. Foto: Iver Daaland Åse
Den største tidstjuven i kvardagen er Twitter, som saman med NRK er ei av plattformene ho brukar til å halde seg oppdatert på det som skjer i samfunnet.
– Men mest av alt sambuaren min som sender meg nyheitssaker på Messenger.
Om ho hadde vakna opp i morgon til draumenyheita si, hadde overskrifta vore: «Gratis kollektivtilbod i heile landet!»
Kanskje kunne ho diskutert saka med ein annan som følgjer med på nyheitene, nemleg draumegjesten hennar Bård Tufte Johansen.
– Eg er stooooorfan av Nytt På Nytt, men eg meiner at han framleis må bli betre til koordinere slips og tørkle.
– Kva eg hadde servert? Pizzaen til pappa! Det er den eine tingen eg meiner alle burde få smake minst éin gong i livet!
Leiaren av Humanistisk Ungdom er fan av Nytt på Nytt og Bård Tufte Johansen, men synest programleiaren så legge inn større innsats på slipsfronten. Foto: Anne Liv Ekroll/NRK
Bokomslag: Gyldendal
– Kva for ei bok burde alle lese?
– Høytleseren av Bernard Schlink. God bok som tar opp masse spanande tema og har fleire tvistar, sjølv om ho er ganske kort.
– Kva serie er ditt beste tips akkurat no?
– Gilmore Girls!
Foto: Netflix
– Kva låt får deg alltid i godt humør?
– Tunneler av TØFL! Årets sommarlåt sidan 2018!
Emilie Madelen Biti-Jessen er oppteken av klima, psykisk helse og å skape møteplassar for unge samar. Foto: Ørjan Marakatt Bertelsen
Fakta
Alder: 21 år
Personleg pronomen: Ho
Frå: Stavanger
Yrke/utdanning: Utdanna statsvitar
Favorittfag på skulen: Historie!
Medlem i: Humanistisk Ungdom, Tryggere Ungdom, Natur og Ungdom
