Elevorganisasjonen krev meir enn dobla bortebuarstipend
Kring 24.000 elevar er bortebuarar, ifølgje tal frå Elevorganisasjonen. Mange av dei må ha jobb for å få økonomien til å gå opp.
Denne artikkelen er eldre enn 1 år gamal. Det betyr at noko av informasjonen kan vere utdatert.
Elevar som ikkje kan bu heime medan dei går på vidaregåande skule har rett på bortebuarstipend frå Lånekassen. I dag er stipendet 4979 kroner i månaden.
Elevorganisasjonen krev at stipendet skal vere minst 12.000 kroner.
– Ingen bortebuarar i Noreg kan leve på 4979 kroner per månad. Elevar skal vere elevar, dei skal ikkje trenge å uroe seg over lommeboka, seier leiar Aslak Berntsen Husby til NRK, som først omtalte saka.
Meiner føresette må dekke utgifter
I Senterpartiet og Arbeidarpartiet sitt forslag til statsbudsjett for 2023 er bortebuarstipendet auka med 660 kroner i månaden, noko elevleiaren meiner er for lite.
Statssekretær Sindre Lysø (Ap) seier til NRK at det er forventa at føresette skal dekke utgiftene til ungdommane:
– Ein må kunne forvente at det er eit samspel mellom dei pengane ein får frå stipendet som dekkjer bukostnadar og at ein då får dei pengane det kostar å leve som ungdom på vidaregåande.
- Les også kva organisasjonane tykte om det føreslegne statsbudsjettet: Frå 5-ar på terningen til at det ikkje er verd å trillast på
Foto: Norsk Målungdom. Privat. Press, Changemaker, Kvenungdommen, Eivind Lotsberg/Elevorganisasjonen.
