Ungarn: Kvinner må lytta på fosterets hjartelyd før abort
Opposisjonen åtvarar om at det kan vere første steg på vegen mot abortforbod.
![](https://framtida.no/wp-content/uploads/2023/09/Andrea-Rygg-Nottveit-svartkvitt-e1695973892347-160x160.jpg)
![info](https://framtida.no/wp-content/themes/framtida/images/info.png)
Denne artikkelen er eldre enn 1 år gamal. Det betyr at noko av informasjonen kan vere utdatert.
Regjeringa i Ungarn har vedteke at helsepersonell må presentera tydelege livsteikn frå fosteret til kvinner som vil ta abort.
Det melder AP.
![](https://media.snl.no/media/146213/standard_compressed_Viktor_Orb%C3%A1n_Tallinn_Digital_Summit_1_.jpg)
Ungarns statsminister Viktor Orbán vann på nytt i 2022, etter å ha sitte som statsminister sidan 2010. Foto: EU2017EE Estonian Presidency (CC BY 2.0)
Foster inn i grunnlova
Vedtaket trer i kraft frå og med torsdag 15. september. Dette er første innskrenkinga av abortrettar etter at statsminister Viktor Orbán i 2011 fekk innført ei ny omstridd grunnlov. Grunnlova slår mellom anna fast at embryo og foster skal vernast frå befruktning.
Abort har vore lovleg i Ungarn sidan 1953. I dag har landet fri abort fram til veke 12, ei grense som kan utvidast til veke 24 i særskilde tilfelle.
Gratis abort er berre eit tilbod til dei med dårlegast råd og kvinner må møta til rettleiing på eit familiekontor før abort.
Ifølgje Statista var det i fjor gjennomført i underkant av 22.000 abortar i Ungarn, noko som er nesten halvparten så mange som i 2010.
- Les også: Vil gjera abort lovleg i Sierra Leone
![](https://upload.wikimedia.org/wikipedia/commons/thumb/5/58/D%C3%B3ra_D%C3%BAr%C3%B3.jpg/800px-D%C3%B3ra_D%C3%BAr%C3%B3.jpg)
Mi Hazank-politikar Dóra Dúró. Foto: Jobbik Magyarországért Mozgalom
Ytre høgre-forslag
Den høgrekonservative statsministeren Viktor Orbán og partiet Fidesz er opptekne av tradisjonelle familieverdiar og har gjort fleire tiltak for å snu landets fødselsratar.
Vedtaket om at kvinner må få presentert livsteikn før dei kan ta abort vart initiert av ytre høgre-partiet Mi Hazank. Mi Hazank-politikar Dóra Dúró hylla vedtaket i eit Facebook-innlegg:
– Ei moglegheit for liv: Frå no av kjem mødrer til å lytte til fosterets hjarteslag. Etter mange års kamp har det endeleg skjedd. Ved å vedta Mi Hazán sitt forslag har regjeringa tatt eit skritt for verkeleg å verna alle foster frå og med befruktninga.
![](https://dkp.hu/uploads/parttagok/14/14.jpg)
Judit Ráczné Földi frå partiet Democratic Coalition. Foto: Democratic Coalition
Opposisjonspolitikar Judit Ráczné Földi frå partiet Democratic Coalition meiner tiltaket er innført for å dra ut tida slik at kvinnene går over tida då det er lovleg med sjølvbestemt abort.
– I fleire land har slike restriksjonar vore startpunktet for ein prosess som har kulminert i abortforbod, åtvarar ho ifølgje Daily News Hungary.
Amnesty: – Vil bidra til at kvinner blir meir traumatisert
Også Amnesty International i Ungarn ser med stor uro på endringa, som dei meiner vil leggja press på kvinner som ynskjer abort.
– Denne endringa fører ikkje til noko, men vil bidra til at kvinner blir meir traumatisert og auka presset på kvinner som allereie er i ein vanskeleg situasjon, seier organisasjonens talsmann Aron Demeter ifølgje Deutche Welle til nyheitsbyrået AFP.