Dillon Helbig lurte den heimelaga boka si inn i hylla på biblioteket. No er det 150 folk som ventar på å låna boka. Det betyr at det er 10 års venteliste!
mm
Janne Nerheim

Denne saka stod først publisert hjå Framtida Junior. Der kan du òg lære kule eksperiment frå Newton-Ane og lese om det dyraste Pokémon-kortet i verda!

Biblioteket har alltid vore ein favorittplass for Dillon og foreldra hans. Dei bur i den amerikanske delstaten Idaho.

– Eg har hatt lyst til å jobba der sidan eg var fem år, fortel Dillon til Framtida Junior.

Mor, Susan Helbig, smiler og nikkar.

– Ja, me har vore der sidan han var liten. Me sit gjerne der for å lesa og kosa oss, fortel ho.

: Susan, Dillon og Alex Helbig synest det er stas med alle tilbakemeldingane dei har fått på boka. Foto: Privat

Ein dag fekk Dillon ei raud skrivebok frå bestemor si. Den bestemte han seg for å fylla med teikningar og tekst.

Då han hadde fylt heile 81 sider, bestemte han seg for å ta boka med på biblioteket.

Eventyrbok

– På framsida av boka skreiv eg «The adventure of Dillon himself», fortel Dillon.

Han har nemleg valt å bruka seg sjølv som hovudkarakter i historia. Han jobba intenst med skriving og teikning i fire heile dagar for å gjera ferdig boka.

– Når han får ein idé stoppar han ikkje før han er ferdig, fortel mora Susan.

Foto: Alex Hartman, Ada Community Library

Sneik boka inn

Men tilbake til dagen då boka hamna i hylla på biblioteket.

– Eg hadde ein plan. Eg heldt handa framføre tittelen på boka, og så sette eg ho i hylla. Då det var gjort, tok eg ned ei anna bok for å skjula at eg hadde sett mi eiga bok i hylla, ler Dillon.

Då han kom heim utan den raude boka, trudde mora at han hadde gløymt den på biblioteket – så ho ringde for å høyra om dei hadde sett den.

– Dei som jobbar der fann den og dei sa dei elska den. Dei likte ideen så godt – og sjefen tok den med heim til sonen sin. Han synest det var den kjekkaste boka han nokon gong hadde lese, fortel ho.

– Dillon har laga bøker av ark han har stifta saman sidan har var 5 år. Me har hjelpt han med staving tidlegare, men ikkje denne gongen. No har han klart seg heilt sjølv, fortel faren Alex. Foto: Alex Hartman, Ada Community Library

Ny bok på gang

No er Dillon i full gang med ei ny bok.

– No er eg ferdig med 53 sider, og denne handlar om eit skap som et jakker. Den er basert på ei sann historie. Dette har faktisk skjedd med meg, fortel Dillon.

– Då han kom heim frå barnehagen mangla det veldig ofte ei jakke – så då tulla me med at skapet i barnehagen et jakker, smiler far hans, Alex.


Eivind Heggset er klar på at han har draumejobben. – Eg håpar eg kan
driva med dette i årevis, seier han.

LES OGSÅ

ANNONSE