Medlemsrekord for Noregs Mållag
I romjula passerte Noregs Mållag 15 431 medlemer, og dermed har organisasjonen det høgste medlemstalet sidan 1985. Medlemstalet har auka med over 50 prosent på 10 år.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Det er kjempestas at så mange vil vere med i Mållaget, jublar Synnøve Marie Sætre, leiar i Noregs Mållag i ei pressemelding.
– At me har så god vekst, gjev oss ekstra giv i arbeidet for nynorsken. Det er viktig når me skal sikre nødvendige gjennomslag for nynorsken i opplæringslova det komande året, seier ho.
Allereie i august passerte Noregs Mållag fjorårets rekordtal med 14 104 betalande medlemer, og i oktober runda organisasjonen 15 000 medlemer.
FpU-banner skapte vekst
Dei siste åra har det vore jamn medlemsvekst. I valkampen gjorde likevel medlemstalet eit kraftig byks.
– Me fekk om lag 1 500 nye medlemer etter at FpU gjekk ut med slagordet «F*** nynorsk» i skulevalkampen, fortel Synnøve Marie Sætre.
Både unge og eldre
Sætre gler seg over at Mållaget har medlemsvekst i heile landet, og at det er både unge og eldre som melder seg inn. Dette er det høgste medlemstalet som registrert i organisasjonen sidan Mållaget byrja med sentral medlemspengeinnkrevjing i 1986.
– Det høge medlemstalet er eit resultat av godt lagarbeid. Me har nær 200 lokale lag over heile landet, og det blir det godt vervearbeid av, smiler Synnøve Marie Sætre. Noregs Mållag har i dag over 5000 fleire medlemer enn for 10 år sidan.
LES OGSÅ: Medlemmar strøymer til Mållaget etter Marit (20) sitt bilete
Marit Voldsund Fjeldvær tok bilete av FpU sin nynorskplakat på skuledebatt i Trøndelag. Foto: Marit Voldsund Fjeldvær, Tobias Eikeland
