Vil ha talar frå kongehuset på nynorsk
I førsteutkastet til nytt arbeidsprogram for Noregs Mållag blir det føreslått at 25 prosent av kongehuset sine talar bør vere på nynorsk.
Denne artikkelen er eldre enn 1 år gamal. Det betyr at noko av informasjonen kan vere utdatert.
Det skriv Sogn Avis.
Leiar i Noregs Mållag, Peder Lofnes Hauge, sit ikkje i arbeidsprogramnemnda, men synest forslaget er gledeleg.
Peder Lofnes Hauge i Noregs Mållag synest det er gledeleg om kongehuset skulle hatt talar på nynorsk. Foto: Jannica Luoto / Noregs Mållag
– Eg tykkjer det er eit spenstig og godt forslag. Det er heilt rimeleg at ein kongefamilie som hevdar å vera for heile landet tek i bruk heile det norske språket, seier Lofnes Hauge til Sogn Avis.
– Så kan ein meina kva ein vil om monarkiet, men kongehuset er offentlege personar. Det dei seier betyr noko for folk. Det er viktig at dei viser at dei er til både for folk som bur i Norge, og dei som bur i Noreg, seier han.
Forslaget blir sendt til mållaget på høyring. Arbeidsprogrammet skal vedtakast på landsmøtet i april 2022.
- Skal tru om forslaget er inspirert av siste bok i Vassbygda-trilogien, der kongen byrjar å snakke nynorsk? Les meldinga av «Gamle menn i syningom» her!
Arnfinn Kolerud er klar med den siste boka i trilogien om Vassbygda, eller var det Vassbygdi? Foto: Samlaget
