Stortinget stemmer over om Noreg skal kvitte seg med monarkiet
Medan det stormar rundt kongefamilien, skal Stortinget ta stilling til om Noreg skal kvitte seg med monarki som styresett.
Diskusjonen om rolla til monarkiet kjem opp med jamne mellomrom når det blir fremja grunnlovsforslag til behandling i Stortinget.
Debatten har fått ekstra fart i lys av ei rekke mediesaker i det siste. Likevel ligg det an til at eit stort fleirtal vil behalde monarkiet når Stortinget voterer tysdag.
- Les også meiningsinnlegget: «Skal blodslinje framleis styra staten?»
Fortidsleivning
SV og Raudt har gjort det klart at dei vil støtte forslaget om å endre Grunnlova for å kvitte seg med monarkiet. MDGs stortingsgruppe er delt: Halve gruppa vil stemme for republikk, medan andre halvdelen vil stemme for monarkiet. Venstre har ikkje medlem i kontroll- og konstitusjonskomiteen, som behandla forslaget. Innstillinga var klar førre veke.
Monarkiet blir av dei tre partia skildra som ei leivning frå fortida som er dårleg eigna som demokratisk symbol. Dei vil heller innføre republikk, men vil forankre dette i ei folkeavstemming.
– Alle stillingar som kviler på nedarva rettar, burde vore eit unnagjort stadium i eit demokratisk samfunn, skriv dei.
Handlar ikkje om innsatsen til kongefamilien
Ein samla komité understrekar samtidig at grunnlovsforslaget er eit prinsipielt spørsmål om statsforma, og ikkje ei vurdering av innsatsen til kongefamilien og historiske betydning.
Grunnlovsendring krev to – tredels fleirtal i Stortinget for å bli vedtekne. SV, Raudt og MDG har til saman 26 representantar. Fleire parti har stilt fri representantane sine slik at dei kan stemme etter eiga overtyding, men det er etter alt å dømme ikkje noko som tyder på at forslaget kan samle dei 113 stemmene som krevst.
