Sex og samfunn bryt samarbeidet med kronprinsesse Mette-Marit

– Sex og samfunn ønskjer ikkje lenger HKH Kronprinsesse Mette-Marit som høg beskyttar for Skamløsprisen, skriv stiftinga Sex og samfunn i ei fråsegn frå leiinga og styret.

VG omtalte saka først.

Stiftinga skriv at det viktige for dei har vore omsynet til pasientane deira, alle overgrepsutsette og alle som står på for å førebyggje seksuelle overgrep, inkludert vinnarane av Skamløsprisen.

– Det er med omsyn til dei vi no ønskjer å avslutte samarbeidet med HKH Kronprinsesse Mette-Marit som vernar for Skamløsprisen, heiter det i uttalen.

Det blir understreka vidare at dei er klare over at dei ikkje veit alt i denne saka.

– Samtidig meiner vi at det som allereie er gjort kjent strir mot det Skamløsprisen står for, heiter det.

Skamløsprisen er ein pris som blir delt ut av Sex og samfunn årleg. Han skal gå til personar som gjennom engasjementet sitt har løfta fram skambelagde område innan seksualitet og skapt ein positiv debatt omkring temaet.

Fleire organisasjonar som har kronprinsesse Mette-Marit som den høge beskyttaren deira har måndag varsla at dei diskuterer situasjonen etter at det vart kjent at kontakten til kronprinsessa med den dømde seksualforbrytaren Jeffrey Epstein var meir omfattande enn det som var kjent.