Victor Sotberg får Dialektprisen 2020

Andrea Rygg Nøttveit
Publisert

info

Denne artikkelen er eldre enn 1 år gamal. Det betyr at noko av informasjonen kan vere utdatert.

– Det betyr faktisk heilt sjukt mykje for meg å få Dialektprisen 2020! Ikkje berre fordi eg er veldig stolt over mi trønderske dialekt, men også fordi eg er glad i dialektar generelt. Eg berre elskar dialektar.

Det seier Victor Sotberg i ei pressemelding frå Norsk Målungdom.

Ufarleggjer dialekt

Dialektprisen går kvart år til eit dialektføredøme for ungdom, og blir delt ut av landsstyret i Norsk Målungdom.

Prisen vart delt ut for første gong i 2001 og har tidlegare gått til profilar P3Morgen, Helsesista og Lothepus.

I år går prisen altså til den 29 år gamle YouTubaren Victor Sotberg frå Steinkjer i Trøndelag.

Leiar i Norsk Målungdom, Gunnhild Sjold, gler seg over dialektmangfald på YouTube. Foto: Frida Pernille Mikkelsen / Norsk Målungdom.

Leiar i Norsk Målungdom, Gunnhild Skjold, rosar Sotberg for å bidra til å ufarleggjere dialektbruk og gjere dialektmangfald gøy gjennom leiking med språket.

– Ved å bruke si klinkande klare steinkjerdialekt gjer han det lettare for barn og unge å bruke dialekta si, seier Skjold i pressemeldinga.

Frå «Weird Norwegian» til «BlimE»

Sotberg starta sin YouTube-karriere under kallenamnet «Weird Norwegian», der han mellom anna prøvde seg på ulike språk.

Etterkvart har 29-åringen teke steget frå det sosiale mediet inn i NRK, som programleiar i NRK Super-satsinga FlippKlipp. I fjor svingte han seg inn på ein tredjeplass i Skal vi danse.

Sist, men ikkje minst har Sotberg profilert seg som frontfigur i kampen mot mobbing, gjennom å dela eigne erfaringar i sjølvbiografien Bare Victor og fronta årets «BlimE»-låt, som Google har kåra til årets mest YouTube-video i Noreg.

Variert dialektinnhald på YouTube

I år er første gong prisen går til ein YouTubar.

– YouTube er blant dei mest brukte tenestene for barn og unge, og ved å møte eit stort og variert dialektmangfald der dei er, vil barn og unge bli sikrare i dialekta si. Det bidrar Sotberg til på ein framifrå måte, seier Skjold i pressemeldinga.


Plateaktuelle Thorleif Bratval (21) trivest på Paulus sykehjem i Oslo, der han bur billig mot frivillig sosialisering og underhaldning.