Ny rapport: Ingen land gjer nok for å beskytta barn frå klimakrisa
Denne artikkelen er eldre enn 1 år gamal. Det betyr at noko av informasjonen kan vere utdatert.
Ingen land i verda gjer nok for å beskytte borna sine for klimakrisa og samanbrot av økosystem, ifølgje ein rapport som vart publisert i The Lancet onsdag.
I studien, som er gjennomført av Lancet, Verdas helseorganisasjon (WHO) og UNICEF har over 40 forskarar teke føre seg data frå 180 land.
- Les også: Greta Thunberg på milliardærtoppmøte: – Ingenting er blitt gjort. Utsleppa har ikkje gått ned
Noreg på topp tre
Forskarane meiner barna si helse og velvære er truga av eksistensielle miljøtrugsar i alle dei aktuelle landa.
Ikkje overraskande fann forskarane ut at barn frå land med høgt karbonavtrykk hadde ei sunnare framtid, enn dei frå lågutsleppsland.
Barn frå Noreg, Sør-Korea og Nederland hadde aller best sjanse til å få god helse, utdanning og næring. Ifølgje tal frå Verdsbanken har både Noreg og dei to andre landa utslepp på om lag 10 tonn CO2 per innbyggjar.
I andre enden av skalaen ligg Somalia, Tsjad og den sentralafrikanske republikken, som har mellom 0,05 og 0,07 tonn CO2-utslepp per innbyggjar.
Awa Marie Coll-Seck frå Senegal jobbar med helserelaterte spørsmål som særleg råkar den tredje verda. Foto: Hervé Cortinat/OECD
Fryktar for framtida
Ein av deltakarane i kommisjonen, Awa Coll-Seck frå Senegal, peika på korleis dei fattigaste landa med lågast utslepp er dei som vert hardast råka.
– Meir enn to milliardar menneske bur i land der utviklinga vert hemma av humanitære krisar, konflikar og naturkatastrofar, problem som i stadig større grad er knytta til klimaendringar, seier Coll-Seck i ei pressemelding.
Helen Clark, som er tidlegare statsminister i New Zealand peikar på at den positive utviklinga der barn og unge får stadig betre helse kan vere i ferd med å snu.
Ho viser til estimat som peikar på at rundt 250 millionar barn under fem år i låg- og mellominntektsland risikerer å ikkje nå sitt fulle potensial, på grunn av fattigdom.
– Men endå meir alvorleg er det at alle barn verda over no står ovanfor eksistensielle trugslar frå klimaendringar og kommersielt press, seier ho i pressemeldinga.
- Les også om ungdomane som klaga inn fem stornasjonar for FN på grunn av klimagassutslepp: – Me står her som barn som har fått rettane sine krenka. I dag kjempar me tilbake
Collage med bilete frå Children VS Climate change
