Kringkastingsringen er letta over Mediestøttemeldinga
Frykta svekka NRK.
Denne artikkelen er eldre enn 1 år gamal. Det betyr at noko av informasjonen kan vere utdatert.
Kulturminister Trine Skei Grande la i dag fram Mediestøttemeldinga «Mangfald og armlengds avstand». Heile meldinga kan du lese her.
Som venta annonserte meldinga ein ny finansieringsmodell for NRK – rikskringkastaren skal ikkje lenger finansierast av lisenspengar, men gjennom skatten.
Kringkastingsringen er letta over at meldinga ikkje endra dei redaksjonelle vilkåra for kanalen:
– Eg er glad for at meldinga slår fast at NRK også i framtida skal ha ei sentral rolle i det norske medielandskapet, seier den nye leiaren i Kringkastingsringen, Kathrine Nygård i ei pressemelding.
NRK med eit særleg ansvar for blindsoner
Samstundes gler Nygård seg over det nye punktet i NRK-plakaten som seier kringkastaren har eit særleg ansvar for «geografiske blindsoner»:
– Det er viktig for oss at heile landet syner att i media. I tider med krav til nedskjeringar og sentralisering er dette eit viktig signal. Me håpar det vil gjera det verre å kome på tankar om å leggje ned distriktskontor. Dei er kanskje dei viktigaste leverandørane av nynorsk journalistikk i NRK, seier Nygård.
Leiaren i Kringkastingsringen understrekar at eit sterkt NRK er viktig for nynorsk og samisk.
Nynorsk ikkje er nemnd med eitt ord i Mediestøttemeldinga, men i eit intervju med Framtida.no opnar kulturminister Trine Skei Grande for at nynorsk kan bli eitt av fleire styringsmål ho vil setja for den nye mediestøtta.
