Når Senterpartiet reiser rundt med valkampbussen sin, er det på både nynorsk og bokmål. – Gilde saker, svarer Noregs Mållag.
mm

– Å ha nynorsk på bussen er heilt naturleg for oss, sidan me er opptekne av å styrkje nynorsk, ta vare på og vidareutvikle språket, seier Trygve Slagsvold Vedum.

– Valkamp er verdikamp, og me vil vise verdiane me står for. Tospråklegheita er ein styrke for Noreg, og ein del av kulturen vår, seier Senterparti-leiaren.

Vedum seier at han løftar fram tospråklegheita i mange av innlegga sine, og at han får positive tilbakemeldingar om det.

Håpar fleire følgjer etter

– Det er gilde saker. Me har to målformer, og ein buss har to sider, så alt ligg jo til rette for det, seier ein nøgd leiar i Noregs Mållag, Magne Aasbrenn.

Aasbrenn håpar fleire parti følgjer etter og bruker meir nynorsk til dømes i reklamar, slagord og partinamn. Han vil sjå Høgre og Arbeidarpartiet, ikkje berre Høyre og Arbeiderpartiet.

– Det er bra at det står gode ting om nynorsk i partiprogramma, men det å bruke nynorsk i praksis viser at dei vil noko med det. At liv og lære heng saman. Minstekravet er at partiprogramma ligg føre på nynorsk, seier han.

Kommer plutseleg til ein by eller bygd nær deg.

تم نشره بواسطة ‏‎Geir Pollestad – Senterpartiet‎‏ في 21 يوليو، 2017

Men det stoppar ikkje med nynorsk der. Aasmund Nordstoga har engasjert seg sterkt og er med i valkampen for partiet. Han skriv eitt stev om dagen om staden dei er på, og dei er sjølvsagt på nynorsk.

Aasmund Nordstoga har engasjert seg for Senterpartiet i valkampen. Foto: Marcel Leliënhof

– I går køyrde me gjennom Sogn og Fjordane, så då var det ikkje vanskeleg å finne inspirasjon. Då tenkte eg på Jølster og dei som friserer landskapet, fortel Nordstoga.

Han er veldig glad for at bussen har tekst på nynorsk.

– Det burde vere sjølvsagt og ikkje noko ein burde bli så glad for, men eg vart altså kjempeglad då eg såg bussen. Då meiner ein at ein vil ta i bruk heile Noreg på alle måtar, seier han.

Nordstoga avsluttar med eit slagord om at heile Noreg inkluderer byane.

– Me er glade i byane våre. Me vil berre ikkje bu der, seier han.

Kommentarar

ANNONSE