Språkrådet uroa for nynorsken
Språkrådet fryktar at nynorsken kan bli skadelidande som følgje av kommunereforma. I eit brev ber rådet Kommunaldepartementet gjere greie for korleis dei vil følgje opp språkutfordringane.
Denne artikkelen er eldre enn 1 år gamal. Det betyr at noko av informasjonen kan vere utdatert.
Fungerande språkdirektør Roy Kristiansen meiner det er viktig at regjeringa følgjer opp den gjeldande språkpolitikken og sikrar nynorskbrukarane eit sterkt vern når nynorskkommunar blir slått saman med bokmålskommunar og språkblanda kommunar.
– Vi veit at bokmålet gjerne blir dominerande der målformene skal leve side om side, både i kommuneadministrasjonen, skulane, avisene og lokalsamfunnet elles, seier Kristiansen i ei pressemelding.
LES OGSÅ: Mållaget: – Ikkje godt nok Sanner
Etterlyser nynorskfokus
I brevet seier Språkrådet seg tilfreds med at regjeringa i kommuneproposisjonen seier dei vil leggje vekt på at «samiske språkbrukere ikke kommer dårligere ut som følge av endringer i kommuneinndelingene», men etterlyser noko tilsvarande for nynorskbrukarane. Det gjorde òg ein samrøystes kommunal- og forvaltingskomité da dei behandla proposisjonen.
«Komiteen ber også om at forholdet til nynorsk som målform får same fokus slik at nynorsk som målform ikkje vert skadelidande som resultat av reforma», heitte det i komitéinnstillinga.
No vil Språkrådet vite korleis kommunal- og moderniseringsminister Jan Tore Sanner (H) har tenkt å følgje opp den klare oppmodinga frå Stortinget.
– Eg oppmodar departementet til å komme med eit snarleg forslag til korleis denne utfordringa kan løysast, seier språkdirektøren.
LES OGSÅ: Over halvparten av kommunane i gang med reform
Mållaget etterlyser
Noregs Mållag publiserte i 2014 rapporten «Rapport om kommunereforma – frå Askvoll til Åseral», som tek for seg førre runde med kommunesamanslåingar og kva utfordringar nynorsken står ovanfor med den nye reforma.
Leiar i Noregs Mållag Marit Aakre Tennø etterlyste då eit utval som tek for seg kåra for nynorsken med kommunereforma.
– No er det utnemnt eit offentleg utval som skal sjå på kva kommunereforma kan bety for samisk, og denne rapporten er ei sped byrjing til ei tilsvarande utgreiing for nynorsk. Det er klart at vi ønskjer oss ei tilsvarande utgreiing om kva konsekvensane blir for nynorsken, seier ho og peikar på at språkmekanismane eigentleg er like for nynorsk og samisk, sa Aakre Tennø til NPK i november.
Då Framtida spurde kommunalminister Jan Tore Sanner om departementet har planar om eit nynorskutval avviste han dette.
– No er ikkje nynorsken like truga som samisk, og eg har tillit til at kommunane sjølv tek språkpolitiske omsyn i samanslåingsprosessane, uttala Sanner til Framtida då han i desember delte ut prisen til årets nynorskkommune.
