«Er det verkeleg lurt å starta 17. mai med alkohol kl. 08?»

Byrådet i Oslo føreslår å opna for alkoholservering på utestader frå klokka 08.00 på 17. mai – fire timar tidlegare enn vanleg.

Bommar på kva 17. mai er

Argumentet deira er at det kan «bremsa promillen», fordi folk då vil drikka ute der det er reglar, i staden for heime.

Men dette forslaget bommar på kva slags dag 17. mai faktisk er.

Dette er barnas dag. Over 30.000 barn er i Oslo sentrum denne dagen, og tusenvis av ungdommar feirar saman med dei.

Er det då verkeleg ein god idé å gjera det lettare for vaksne å byrja å drikka til frukost der barna er?

Me i Juvente meiner dette sender heilt feil signal. Ikkje fordi me er ønskjer å vera strenge, men fordi me veit kva auka synlegheit av alkohol betyr for barn og unge.

Påverkar stemninga

Når vaksne drikk tidleg, mykje og offentleg, påverkar det korleis barn opplever både stemninga og tryggleiken rundt seg.

Dei fleste barn tenkjer ikkje på promillegrenser og kontrollsoner. Dei merkar berre om vaksne er annleis – høglydte, ustø eller ubehagelege.

At nokon vel å ta seg eit glas eller to heime til frukost er éin ting. Men når byen legg til rette for at store mengder vaksne skal kunna drikka frå tidleg morgon, midt i barnetoget, då meiner me det er på tide å stoppa opp og spørja: Kven er eigentleg denne dagen til for?

Me forstår at folk ønskjer å kosa seg. Men det må vera mogleg å feira 17. mai utan at alkoholen må koma så tidleg på bordet.

Å utsetja skjenkinga til klokka 12, slik det brukar å vera, er eit enkelt, lite tiltak som gjer det lettare å halda denne dagen trygg, hyggjeleg og inkluderande for alle – særleg for barna.