Noreg er blant dei største «eksportørane» av klimautslepp: – Flautt
Noreg er på tiandeplass på ei rangering av land basert på CO2-utsleppa frå forbrenning av dei fossile brensla som landa eksporterer. – Flautt, meiner MDG.
Analysen er gjort av forskar Robbie Andrew ved klimaforskingsinstituttet Cicero i Oslo. Han er tysdag publisert av nettstaden Carbon Brief og omtalt av den britiske avisa The Guardian.
Utgangspunktet for rangeringa er utslepp av klimagassen CO2 frå forbrenning av eksportert kol, olje og gass frå midten av 1800-talet og fram til i fjor.
Det er eksportlanda som står på lista – sjølv om sjølve utsleppa skjer i andre land.
Russland og Saudi-Arabia på topp
Rangeringa blir toppa av Russland, som har store førekomstar både av olje, gass og kol. På andreplass ligg Saudi-Arabia, som i mange år var verdas største eksportør av olje.
Deretter følgjer Australia, Venezuela og Iran. På tiandeplass ligg Noreg, som fann olje i Nordsjøen på slutten av 1960-talet og i dag er storeksportør av både olje og gass.
Dersom «eksportutsleppa» blir fordelte på innbyggjartalet, rykkjer Noreg heilt opp på ein fjerdeplass.
Dei einaste som då er føre Noreg, er tre andre små land med store olje- og gassførekomstar: Brunei, Kuwait og Qatar.
Analysen av utsleppa er publisert samtidig som forhandlingane på klimatoppmøtet i Tyrkia nærmar seg innspurten.
– Må leia an i omstillinga
Stortingsrepresentant Frøya Skjold Sjursæther frå Miljøpartiet Dei Grøne reagerer sterkt på funna i analysen.
– Det er skikkeleg flautt at Noreg er verdsleiande på å eksportera klimaendringar. Vi må leia an i omstillinga bort frå olje og gass, ikkje kasta meir bensin på bålet, seier ho i ei fråsegn til NTB.
– Då Jonas Gahr Støre vart statsminister, lova han å bli ein klimaforkjempar. Statsministeren må slutta å snakka og byrja å gjera. Det må bety ein stans i oljeleiting i Arktis – av omsyn til natur, klima og omstilling, legg ho til.
I dei fleste samanhengar er det berre utslepp innanfor eigne grenser som blir tekne med når ulike lands klimautslepp blir diskuterte. Basert på denne «målestokken» er det Kina og USA som har dei største utsleppa.







