Realfag gir dårlegare utteljing på vitnemålet: – Vi må snu alle steinar

Det er forskarar ved Universitetet i Oslo (UiO) som har fått i oppdrag å undersøkje korleis det å velje realfag på vidaregåande påverkar det endelege vitnemålet.

Rapporten, som er bestilt av Kunnskapsdepartementet, viser at det er vesentleg vanskelegare å få gode karakterar i realfag enn i andre valfag som samfunnsfag, språk og økonomi.

Konsekvensen blir at elevar vel bort realfag til fordel for fag som blir rekna som enklare.

– Fleire må velje realfag på vidaregåande, så fleire kan gå vidare til å studere realfag og teknologi. Vi skal ikkje gjere realfaga lettare, men vi må sørgje for at det ikkje opplevest som ei ulempe å velje dei, seier forskings- og høgare utdanningsminister Sigrun Aasland (Ap).

– Merkbar karakterulempe

Forskarane har laga ei simulering av korleis gjennomsnittskarakterane i dei ulike faga ville sett ut dersom alle elevar måtte gjennom alle fag.

Resultatet viser at det er dei fagleg sterkaste elevane som vel realfag – utan at det nødvendigvis synest på dei endelege karakterane.

– Realfaga skil seg ut i kor krevjande det er å få gode karakterar i dei, og samla gir dette ei merkbar karakterulempe for elevar som spesialiserer seg i realfag, heiter det i konklusjonen til forskarane.

Dei estimerer at realfagselevane kunne «tent» så mykje som 3,7 karakterpoeng på å velje samfunnsfag framfor realfag.

Ei rekke høgare utdanningar stiller likevel opptakskrav om ulike matematikk- og naturfag elevane må ha vore gjennom.

– Det er framleis lurt å velje realfag på vidaregåande, fordi desse faga opnar mange dører. Men vi må også motivere fleire, seier Aasland til NTB.

Ho understrekar at Noreg treng fleire folk med kompetanse innanfor realfag og teknologi.

Vil revurdere tilleggspoeng

Dagens ordning for tilleggspoeng gir elevar maksimalt 4 ekstra karakterpoeng for å velje realfag. Ein kan også få tilleggspoeng for andre ting, som språkfag, alder, avlagd førstegongsteneste og høgare utdanning.

Som følgje av ei utgreiing frå 2022 blir dei aller fleste tilleggspoenga skrota frå og med hausten 2028. Realfagspoenga blir halverte.

Forskargruppa bak den nye rapporten anslår likevel at dei halverte realfagspoenga «ikke lenger vil veie opp for at det er vanskeligere å få gode karakterer i realfag».

Aasland varslar no at regjeringa vil revurdere kutta.

– Vi må snu alle steinar i arbeidet med å få fleire til å velje realfag. Til dømes meiner eg vi må gjere ny vurdering av realfagspoenga. Kva endringar det eventuelt blir, kjem vi tilbake til om ikkje lenge, seier ho.

– Andre tiltak kan vere fleire forkurs og fleire vegar inn i realfagsstudiar. Alt dette og meir skal vi utforske i realfagsstrategien vi jobbar med no.