Halvparten av masterstudentar synest det er vanskeleg å få jobb
Over halvparten av nyutdanna med mastergrad opplever at det er vanskelegare enn venta å få relevant jobb, viser ei ny undersøking. To fagområde skil seg ut.
Undersøkinga er gjennomført av Nordisk institutt for studiar av innovasjon, forsking og utdanning (Nifu), skriv Khrono.
52 prosent oppgir at det har vore vanskelegare enn venta å finne arbeid som samsvarer med kvalifikasjonane. Det er ein auke frå 37 prosent ved førre undersøking i 2023. Berre 17 prosent seier det har vore lettare enn venta.
Blant nyutdanna med mastergrad innan realfag og samfunnsfag opplever to av tre at overgangen til arbeidslivet vart vanskelegare enn dei hadde sett for seg.
Prosjektleiar Jannecke Wiers-Jenssen ved Nifu seier dei ikkje kan slå fast heilt sikkert kva som forklarer at overgangen vart vanskelegare i 2025 enn i tidlegare år.
– Det kan handle om den generelle situasjonen i arbeidsmarknaden, men vi kan heller ikkje utelukke at kunstig intelligens erstattar enkelte innstegsjobbar, seier ho.
