Vekas viktigaste: Historisk handelsavtale, meir fornybar energi og flaum i Mosambik

ICE får beskjed om å unngå konfrontasjonar

I over ein månad har det vore konfrontasjonar mellom ICE – innvandringsstyresmaktene i USA – og demonstrantar i byen Minneapolis. To innbyggjarar har blitt drepne av dei føderale agentane, og no har ICE fått instruks frå sentralt hald om å unngå konfrontasjonar og fokusere på innvandrarar som er sikta eller dømt for kriminalitet.

Laurdag 24. januar vart Alex Pretti (37) skoten og drepen av ICE i Minneapolis, skriv VG. Måndag vart Gregory Bovino, som har leia ICE-oppdraget i byen, kalla tilbake frå Minnesota av Trump-administrasjonen. Ifølgje NRK har agentane som skaut Pretti blitt suspenderte.

Det skjer litt over to veker etter at Renee Good (37) også vart skoten og drepen i Minneapolis av ICE.

Både Alex Pretti og Renee Good var amerikanske statsborgarar, og kritikken og demonstrasjonane mot styresmaktene har vakse i omfang sidan desse dødsfalla.

Brutal maktbruk mot demonstrantar i Iran

6479 er stadfesta døde i Iran som følgje av demonstrasjonane mot styresmaktene, og over 42 000 menneske skal vere arresterte, ifølgje den USA-baserte menneskerettsorganisasjonen HRNA.

Organisasjonen fryktar at dei faktiske tala er mykje høgare. Anonyme kjelder i helsedepartementet til Iran skal ha sagt til Time Magazine at over 30 000 menneske kan vere drepne i samband med demonstrasjonane.

Internett har vore stengt i fleire veker, men har begynt å kome tilbake i nokre område, under streng kontroll av styresmaktene, ifølgje BBC.

EU vedtok torsdag å klassifisere revolusjonærgarden i Iran som ein terroristorganisasjon for framferda mot demonstrantar, ifølgje Reuters, og Noreg sluttar seg til dei følgjande sanksjonane mot Iran.

EU og India einige om ein historisk handelsavtale

Ein fjerdedel av verdsøkonomien, med to milliardar menneske, blir omfatta av avtalen. Avtalen inkluderer òg Efta-landa Noreg, Island, Liechtenstein og Sveits.

Avtalen India og EU har blitt samde om fjernar 97 prosent av all toll på varer frå EU til India, og vil på sikt gi tollfridom på 90 prosent av norske varer til India, ifølgje Nettavisen.

Ifølgje avisa vil avtalen tre i kraft i løpet av eitt år, etter at dei juridiske dokumenta er signerte og avtalen er vedteken i EU-parlamentet og dei forskjellige EU-landa.

Semja kjem kort tid etter EU signerte ein avtale med det søramerikanske frihandelssamarbeidet Mercosur, og EU inngjekk i fjor fleire handelsavtalar med Mexico, Indonesia og Sveits.

Over ein halv million påverka av flaum i Mosambik

125 personar har døydd i Mosambik sidan regntida starta i oktober. Fleire titusen innbyggjarar blir redda frå overfløymde område, og innbyggjarar BBC har prata med kallar det den verste flaumen i si livstid.

Sidan 7. januar er minst 642 122 menneske påverka av flaumen, særleg i dei sørlege og sentrale regionane av landet.

Det er venta endå meir flaum rundt Inkomati-elva den komande tida, nordvest for hovudstaden Maputo, etter mykje regn i Sør-Afrika.