Vil stansa rekruttering av barn til kriminelle nettverk: – Ein kynisme me blir sjokkerte av
I dag skal fleire statlege direktørar møta politiet for å finna ut kva dei saman kan gjera for å stansa rekruttering av barn til kriminelle nettverk.
– Me synest jo det er svært alvorleg at barn blir rekrutterte av desse kriminelle miljøa til valdsoppdrag. Og det er jo ein kynisme her som me alle lèt oss sjokkera av, seier direktør Hege Nilssen i Barne-, ungdoms- og familiedirektoratet (Bufdir) til NTB.
I møtet med direktørane i Politidirektoratet, Helsedirektoratet og Utdanningsdirektoratet skal Bufdir-sjefen både diskutera kva barnevernet må jobba med sjølv, og korleis dei kan jobba saman med andre etatar for å få bukt med problemet.
Bakteppet for møtet er fleire hendingar dei siste vekene der mellom anna unge gutar i 13-årsalderen har delteke i alvorleg kriminalitet.
Politiet trur barna fekk oppdraga på bestilling frå det svenske foxtrot-nettverket gjennom sosiale medium.
– Barnevernsbarn meir utsett
– Me veit at barna våre i barnevernsinstitusjonar kan vera meir utsette for rekruttering. Då er det viktig for oss at våre tilsette får kunnskap om korleis rekruttering skjer og kva faresignal dei må vera merksame på, seier Nilssen.
Ho seier at problematikken med barn som blir rekrutterte til kriminelle nettverk, må sjåast på som eit samfunnsproblem.
Frå før leier Bufdir det såkalla Etatssamarbeidet. Der jobbar direktørar frå ulike direktorat og etatar på tvers av departementa med tiltak for utsette barn og unge.
Bufdir-sjefen håpar no å styrkja dette samarbeidet framover.
– Veldig mange av desse barna kjem til oss i etterkant av å ha gjort seg skuldig i alvorlege handlingar. Me er opptekne av at me skal kunna gi dei eit tilbod som bidreg til at dei kan meistra liva sine. Og det må me gjera i eit samarbeid på tvers av både politi, helsa, skule og Kriminalomsorgen, seier ho.
– Skulemiljøet er viktig
Ein viktig stad for å fanga opp om barn er sårbare for å bli lokka inn i kriminalitet er skulen, meiner Morten Rosenkvist, direktør i Utdanningsdirektoratet.
– Opplever du utanforskap eller er i ferd med å falla ut av skulen, er du mykje nærare til å kunna bli plukka opp av kriminelle nettverk. Derfor er skulemiljøet veldig viktig, seier han til NTB.
I møtet hos politidirektøren med helsedirektøren og Bufdir-sjefen skal Rosenkvist ta opp betydninga av fellesskulen.
Der er alle innom, og Udir-sjefen meiner at det viktigaste skulen bidreg med når det gjeld rekruttering av sårbare barn til kriminelle nettverk, er førebygging. Det handlar om å leggja til rette for eit godt skulemiljø, seier han.
Følgjer med på fråvær
Eit konkret døme på kva skulen kan følgja med på, er fråvær, seier Udir-sjefen.
– At elevar får eit urovekkjande fråvær kan bety veldig mange ulike ting, men som regel er det ein første indikasjon på at noko er gale. Fråvær betyr jo sjølvsagt ikkje at elevane blir rekrutterte av kriminelle nettverk, men då er vårt råd at skulen tek tak i dette raskt, for då finn du ofte også ut årsaker og kan byrja å løysa problem medan barna enno er små.
Men skulen må jobba med andre instansar i samfunnet for å lykkast med førebygginga, understrekar Rosenkvist.
– Det vil jo oppstå problem som skulen ikkje kan løysa åleine, og då treng eleven eit lag rundt seg. Då snakkar me om politi, barnevern, helsetenester og Nav. Og frå Utdanningsdirektoratet si side synest me at det er veldig viktig at desse ulike aktørane er best mogleg koordinerte.
