«No må Arbeidarpartiet vise at dei ønskjer å trekkje Oljefondet ut av okkupasjon»

Laurdag vil Arbeidarpartiets landsmøte vise Noreg om dei framleis er eit internasjonalt solidaritetsparti, og lojale i kampen for eit fritt Palestina.

Den sitjande regjeringa har gjort meir for Palestina enn dei andre partia på meiningsmålingane ville gjort, men det er langt frå nok. Skal Arbeidarpartiet ha håp om å vinne valet neste haust, må dei vise at dei meiner alvor og følgjer opp ambisjonane sine med konkrete tiltak.

Må vise at dei er eit solidaritetsparti

Regjeringa har anerkjent Palestina som stat og auka dei økonomiske bidraga ved fleire høvee. Det er viktig, men langt frå tilstrekkeleg.

Arbeidarpartiet ligg på topp på meiningsmålingane, men når dei to partia bak dei ikkje vil bruke tid på Palestina, meiner sanksjonar er bortkasta og manglar konkrete forslag for varig fred, må Arbeidarpartiet vise at dei framleis er eit solidaritetsparti.

For snart eit år sidan kom ICJ med ei rådgjevande uttale som stadfesta at statar må gjere alt dei kan for å stanse Israel sin okkupasjon av palestinske område. Dei frårådde frå å investere i selskap som bidreg til okkupasjonen. Også FN har svartelista fleire selskap som bidreg til okkupasjonen.

Oljefondet investerer framleis milliardar i slike selskap. Regjeringa har frårådd investeringar i desse selskapa, men det har ikkje ført til mykje endring. Dessutan er det nødvendig å få til eit forbod som òg må gjelde for investeringar i oljefondet. Korleis kan Arbeidarpartiet påstå at dei står opp for folkeretten når dei ikkje følgjer opp med handling?

Fjerna ambisjon om sluttbrukarerklæring

Det er òg oppsiktsvekkjande at programkomiteen har gått inn for å fjerne ambisjonen om sluttbrukarerklæring på sal av alt forsvarsmateriell.

Norske komponentar skal ikkje ende opp i Israels angrepsfly, brukte mot sivile i Gaza. Det har både regjeringa og Arbeidarpartiet sagt, no må dei tørre å gjennomføre politikk som faktisk er med på å endre dagens praksis. Landsmøtet må vise ansvar og sikre at norske våpendelar ikkje blir brukte i folkemord.

Arbeidarpartiet må vise at dei lyttar til folket, som i over to år har mobilisert over heile landet for at Noreg skal gjere alt i si makt for eit fritt Palestina.

No må Arbeidarpartiet vise at dei ønskjer å trekkje Oljefondet ut av okkupasjon, innføre sanksjonar mot Israel og forby import av varer frå okkupert palestinsk jord.

Kamp for folkeretten

Landsmøtet må vise at dei følgjer med, og tek kampen for folkeretten, menneskeverd og eit fritt Palestina.

Viss ikkje landsmøtet gjer partiet sine ord om til handling, kan ikkje Arbeidarpartiet lenger kalle seg eit solidaritetsparti.