«Du skal kunne kalle deg feminist utan å vere sosialist»

Feminismen tilhøyrer ikkje éi politisk side. Den er for alle. Du skal kunne kalle deg feminist utan å vere sosialist. 

Debatten om likestilling er viktigare enn nokon gong. Vi ser at fleire kvinner i verda blir heilt grunnleggjande rettar fråtekne som det å køyre bil eller ta ei utdanning. Då er det viktig at begge dei politiske sidene kan ta eigarskap til feminismen.

Det politiske standpunktet ditt skal ikkje avgjere om du er feminist eller ikkje. Slik det er no, blir feminisme assosiert med sosialisme og aktivistar på venstresida, fordi desse ytrar meiningane sine høgast.

Det at høgresida ikkje tek nok eigarskap til feminismen, gjer at venstresida åleine dominerer omgrepet og at mange misforstår kva det å vere feminist faktisk inneber.

Likestillingspolitikk eller feminisme er ikkje noko særeige for venstresida.

Når parolane i kvinnetoget fokuserer på 6-timars arbeidsdagar, kjønnstilpassa verneutstyr og å «la pornoen brenne», er det klart at meininga til feminismen blir verande i skuggen.

Feminisme handlar først og fremst om å kjempe for fridom, og at kvinner og menn skal ha dei same moglegheitene. Det handlar ikkje om sosialistisk aktivisme.

Før handla feminisme om å kjempe for fridom, like moglegheiter, og sjølvråderett. No knyter dei fleste ordet til ein slags konkurranse mellom kjønna og overlegenheit, nettopp fordi det er dette venstresida legg vekt på.

Vi er nøydde til å fokusere på den opphavlege målet og meininga til feminismen. Målet er ikkje at menn skal overvinnast av kvinner eller at ei politisk side skal vinne ein debatt. Målet er at kvinners rettar blir varetekne og at vi kvinner skal ha dei same moglegheitene som menn.

Feminismen er for alle, og ein skal kunne kalle seg ein stolt feminist utan å vere på venstresida.