Fleire studentar brukar KI: – Som å køyre bil utan lappen

81 prosent av studentane bruker kunstig intelligens (KI) i studiearbeidet sitt, men berre éin av tre har fått opplæring. Det viser resultat frå Studiebarometeret for 2024.

KI-bruken har auka kraftig det siste året, frå 61 prosent i 2023. Studentar innan økonomiske og administrative fag bruker KI mest, medan dei på humanistiske og estetiske fag bruker det minst.

26.000 studentar har svart på undersøkinga som Nasjonalt organ for kvalitet i utdanninga (Nokut) har gjort for Kunnskapsdepartementet.

Bruker mindre tid på studia

Heiltidsstudentar bruker i snitt 32,5 timar i veka på studium. Det er den lågaste tida målt av Studiebarometeret på dei ti åra undersøkinga har vore gjennomført.

På det meste, i 2016, brukte studentane i snitt 35,5 timar på studia.

Nokut meiner nedgangen i tidsbruk tidlegare har vore fordi studentane har jobba meir ved sida av, men no er det KI-bruken som gjer at dei får meir fritid.

– Som å køyre bil utan lappen

Kaja Ingdal Hovdenak, leiar av Norsk studentorganisasjon (NSO), meiner resultata frå Studiebarometeret er alvorlege.

– Å bruke KI utan tilstrekkeleg opplæring er som å køyre bil utan lappen, rett og slett uforsvarleg. Her må både utdanningsinstitusjonane og regjeringa på banen og ta behovet for opplæring i KI-verktøy på alvor, seier ho.

NSO-leiaren meiner det er ansvaret til utdanningsinstitusjonane å sørgje for at studentane lærer seg å bruke den populære teknologien.

– At nokre studentar får opplæring og blir oppmuntra til å bruke KI medan andre ikkje får det blir opplevd som urettferdig og skeivt, seier Ingdal Hovdenak

KI-studentane sparer tid

Undersøkinga tyder på at studentar som aldri bruker kunstig intelligens, bruker meir tid på studia enn dei meir KI-ivrige medstudentane sine.

Studentane bruker KI mest til å få forklart pensum, stavekontroll, oppsummeringar og til å diskutere fagstoff. Samtidig oppgir berre 30 prosent av studentane å ha fått opplæring i KI-verktøy.

– Studentane er allereie ivrige KI-brukarar. Brukt rett er dette positive nyheiter, men vi ser også at studentane saknar opplæring i korleis bruke dei nye verktøya rett, seier forskings- og høgare utdanningsminister Sigrun Aasland (Ap).

Aasland fortel at dei no skal setje ned eit utval som skal gi råd om KI i høgare utdanning.

Stort sett fornøgde med studiekvaliteten

Vidare viser undersøkinga at studentane er like fornøgde, eller litt meir fornøgde samanlikna med i 2023. Studentane innan religion, arkeologi og fysikk er mest fornøgde, medan grunnskulelærar-, lektor- og odontologistudentane er minst fornøgde.

Matematikk og statistikk aukar mest på kvalitet frå året før.

– Det er positivt at studentane i stor grad svarer at dei er fornøgde med kvaliteten på studieprogrammet sitt, sjølv om det er ein del variasjonar mellom studiestader og utdanningstypar, seier Nokut-direktør Kristin Vinje.