Ap-regjeringa vil garantere alle under 30 år tilbod om jobberfaring

– I dag er det 111.000 personar under 30 år som ikkje er i arbeid eller utdanning. Nokre av dei er på språkreise på Bali. Nokre av dei er veldig sjuke. Men mange titals tusen av dei kunne vore i aktivitet på ein eller annan måte, dersom vi klarte å få tak i dei, seier arbeids- og inkluderingsminister Tonje Brenna til NTB.

– Dei vi får tak i, dei lykkast ganske godt, men det tek for lang tid før vi får tak i dei, legg ho til.

Brenna starta onsdagen på Fontenehuset i Oslo sentrum saman med helse- og omsorgsminister og med-nestleiar Jan Christian Vestre.

Der presenterte dei ny politikk frå den nye regjeringa sitt nye «ungdomsløft».

– I dag har vi ein ungdomsgaranti. No utvidar vi garantien til også å handle om arbeidserfaring.

Ungdomsgarantien har eigentleg handla om å hjelpe folk over terskelen. No seier vi også at vi skal samarbeide tettare for å senke terskelen inn i arbeidslivet for unge folk, seier Brenna.

• Les også: Vetle tok over garden då han var 20: – Veit ikkje om eg hadde tort om eg visste alt eg måtte lære

Ny ungdomsyting

Dei to nestleiarane fortel om god stemning i Arbeidarpartiet om dagen, og seier at dei skal bruke 100 prosent av energien sin på ny politikk.

Mellom anna det dei kallar eit krafttak for at unge utanfor utdanning og arbeid skal komme i jobb.

– Vi veit jo at jo lenger du er borte frå anten utdanning eller arbeid, jo vanskelegare blir det å komme inn igjen, og jo lågare sjølvkjensle og dårlegare sjølvtillit får du, og du blir stadig pusha lenger bort, seier Vestre til NTB.

Blant dei mange tiltaka dei presenterer, er:

• Prioritert innsats i Nav til unge mellom 16 og 30 år. Mellom anna fleire ungdomsrettleiarar på Nav-kontora.
• Ei ny ungdomsyting utan at nedsett helsetilstand er eit inngangsvilkår.
• Forsøk med fireårig lønnstilskot for utsette unge.
• Eit nytt rekrutteringsprogram for unge til helse- og velferd.

Vestre: – Vi har sløst for mykje med ressursane

– Vi må kunne seie at Noreg gjennom nokre år har sløst for mykje med ressursane. Vi har teke for gitt at vi får løyst alle oppgåvene, og vi har mykje pengar i dette landet. Men vi har ikkje sett kor stor problem dette eigentleg er for kvar enkelt, seier Vestre.

Han peikar på at Noreg kan komme til å mangle opp mot 180.000 i helse- og omsorgssektoren i framtida.

– Det er ei bekymring at vi har rundt 100.000 unge under 30 år som verken er i utdanning eller arbeid. Det må vi gjere noko med. Det er veldig sløsing med ressursane i samfunnet fordi vi har store uløyste oppgåver, seier han.

Totalt ønskjer regjeringa å få 150.000 fleire menneske i jobb innan 2030.

– Kvart ungt menneske som har talent, er nysgjerrig og har lyst til å jobbe innanfor helse- og omsorg, som ikkje får høve til det, er ei tapt moglegheit, seier helseministeren.

Rosar Fontenehuset

Onsdag morgon snakka dei to statsrådane med mange av folka som åt frukost på Fontenehuset i Oslo sentrum, som er eit arbeidsfellesskap for menneske som har eller har hatt ein psykisk sjukdom.

Brenna seier at dei skal løyse den nye ungdomsgarantien gjennom fleire samarbeidsavtalar med nettopp Fontenehus, med vidaregåande skular og lokale avtalar mellom Nav og andre instansar.

– Fontenehuset er jo eigentleg det beste dømet i verda på kva vi kan få til når styresmaktene og nokon som absolutt ikkje er styresmaktene, samarbeider. Fordi på Fontenehuset er det null terskel for å komme, medan til dømes det å gå inn på Nav-kontor eller oppsøkje helsetenesta kan for mange menneske vere ein terskel, seier Brenna.

– Vi må sørgje for at unge menneske som er urolege for om dei vil ha ei inntekt i framtida, og kanskje ikkje er 100 prosent friske, til dømes tidleg i 20-åra, ikkje byrjar på løpet mot uføretrygd, men i staden får ei inntektssikring som gjer at dei kan komme seg aktivitet, få erfaring, fullføre vitnemål viss det er det dei har behov for, men også komme seg jobb.

• Les også: «Gen Z» prioriterer balanse mellom arbeid og fritid over løn

Løn er ikkje det viktigaste for «Gen Z» som arbeidstakar.