Éin av tre tenåringar har sett slåssing på nett

Tal frå undersøkinga Barn og medier 2022 viser at 30 prosent i alderen 13–18 år har sett planlegging av slåssing eller slåstkampar i det siste året, like mange som i 2020. 33 prosent har sett sal av alkohol på nett, mot 28 prosent i 2020. 23 prosent har sett sal av hasj/marihuana på nett, same del som i 2020.

Mari Velsand er direktør i Medietilsynet. Foto: Medietilsynet/ Thomas Ekström

– Vi meiner at tenester som Tiktok, Instagram og Snapchat må auke innsatsen for å hindre spreiing av slikt innhald, uttaler direktør i Medietilsynet Mari Velsand i ei pressemelding.

Nettpatruljen ved Oslo politidistrikt melder om ein delingskultur som bekymrar. Valdsvideoane blir delte hyppig, og valden er grovare enn før.

– Å bli eksponert for vald og rusmiddel på digitale plattformer kan bidra til at dette vert opplevd som normalt. Det kan også senke terskelen for å prøve rusmiddel i tidleg alder, eller bidra til at ulovleg innhald blir delt vidare, seier Velsand.’

• Les også: Éin av fire unge har opplevd hatprat på nett

Læringsopplegg

Avsnittsleiar Anne Katrin Storsveen Oppegaard i Nettpatruljen seier dei ofte får tips om valdsvideoar som blir spreidde, og at dei snakkar med den fornærma som står i ein svært vanskeleg og traumatisk situasjon.

– Ungdom må få kunnskap om at deling av valdsvideoar er ulovleg og at delinga aukar belastninga for den som har vorte filma i ein sårbar situasjon. Spreiing og liking av videoar kan dessutan indirekte bidra til at nye videoar blir laga og lasta opp, seier Storsveen Oppegaard.

For å lære ungdom om konsekvensar av å dele valdsvideoar, har Kripos nyleg lansert læringsopplegget «Dele = delta». Formålet er å gi ungdom kunnskap til å ta gode val.

Politiet ønskjer å få tips om kontoar som tilbyr narkotika og alkohol til mindreårige.

– Nettet skal ikkje vere ein arena for omsetning av ulovlege varer, seier Storsveen Oppegaard.

• Les også: Medietilsynet: Halvparten av borna meiner foreldre legg ut bilete av dei utan å spørje

Omfattande materiale

Medietilsynet har samla data om mediekvardagen til barn og unge sidan 2006, noko som gjer det mogleg å følgje utviklinga over tid. I undersøkinga i år har cirka 3.200 9–18-åringar frå 78 skular over heile landet delteke. Det er også gjennomført ei foreldreundersøking, med cirka 2.200 respondentar med barn i alderen 1–17 år.

– Heldigvis er det eit mindretal blant ungdommane som har vore eksponerte for slåstkampar og sal av rusmiddel, og det er bra at delen ikkje er aukande. Likevel er det viktig å skjerpe innsatsen mot slikt innhald på nett, seier Velsand.

• Les også: Russland: 18-åring risikerer 6 år i fengsel for å bruke Instagram

Skjermdump frå Instagram-kontoen til Veronika Loginova.