Moddi blir hetsa for å spele på vindpark-arrangement
Artisten Moddi skriv på Facebook at han opplever hets og sjikane fordi han tysdag skal spele ein konsert i samband med open dag ved Havøygavlen vindpark i Måsøy i Finnmark.
Denne artikkelen er eldre enn 1 år gamal. Det betyr at noko av informasjonen kan vere utdatert.
I Facebook-innlegget skriv han at innboksen hans dei siste dagane har kokt på ein måte han ikkje har sett sidan han avlyste ein konsert i Israel i 2014. Då vart han kalla antisemitt, og det vart laga bilete av han med hakekors og klovnenase.
– Det er ikkje like ille no, men meir enn nok til å lage ein solid knute i magen, skriv Moddi.
Han seier til Nationen at han ikkje stiller seg bak alle vindkraftprosjekt, men at prosjektet i Havøysund likevel er spesielt. Han minner at anlegget er heileigd av kommunane i Finnmark, og at dei vart oppførte lenge før grøne sertifikat gjorde det lukrativt å spekulere i vind- og småkraft. Det er avgrensa naturinngrep og utan store konsekvensar for fugle- og dyreliv, meiner han.
Og artisten minner også om at innbyggjarane i området er positive til vindparken.
– Prosjektet har 100 prosent lokal forankring, stor lokal oppslutning og det gir sårt naudsynte pengar for hardt pressa finnmarkskommunar.
Les også: MDG-politikar Oda Sofie Pettersen (21) les ikkje kommentarfelt om ho kan unngå det
21 år gamle Oda Sofie Pettersen var førstekandidat i MDG Agder, som stilte felles liste til stortingsvalet. Foto: Jonas Stefan
