New Zealand har fått sin første kvinnelege utanriksminister med urfolksopphav
Nanaia Mahuta vert den nye utanriksministeren i det som ligg an til å verte ein av dei mest mangfaldige nasjonalforsamlingane i verda.
Denne artikkelen er eldre enn 1 år gamal. Det betyr at noko av informasjonen kan vere utdatert.
For fire år sidan vart māoriske Nanaia Mahuta den første kvinnelege medlemen i New Zealand si nasjonalforsamling med moko kauae, den tradisjonelle tatoveringa på haka.
No vert Mahuta også den første kvinnelege utanriksministeren med urfolksopphav i landets historie.
Opnar stengde dører
Nanaia Muhata vart vald inn i nasjonalforsamlinga for første gong i 1996, og representerer Arbeidarpartiet i New Zealand.
Då ho vart utpeika til landets neste utanriksminister fortalde Muhata at ho var priviligert som får leie utanrikssamtalane dei neste åra.
– Eg håpar mange andre kvinner med māorisk og blanda opphav frå heile New Zealand vil sjå dette som å igjen opne dørene til område som til no har vore stengde for oss når det gjeld profesjonelle mogelegheiter, sa Muhata ifølgje Radio New Zealand.
Nanaia Muhata skal ta til i jobben 6. november, og tek over etter Winston Peters, som også har māorisk opphav.
Verdas mest mangfaldige nasjonalforsamling
Statsminister Jacinda Ardern. Foto: Governor-General of New Zealand
Arbeidarpartiet i New Zealand vart gjenvalt førre månad, og statsminister Jacinda Ardern fekk fornya tillit.
Den komande nasjonalforsamlinga ligg an til å verte eit av verdas mest mangfaldige, ifølgje CNN.
Halvparten av medlemmane kjem til å vere kvinner og kring ti prosent av medlemmane er opent LHBT+.
På verdsbasis held kvinner berre 24 prosent av setene i nasjonalforsamlingane, og tidlegare var det Storbritannia som kunne skryte på seg å ha flest LHBT+politikarar i si nasjonalforsamling, med sine sju prosent.
Då ho annonserte si nye regjering, sa Jacinda Ardern ifølgje CNN at ho er stolt over kor mangfaldig den er.
– Dei speglar det New Zealand som valde dei.
- Les også intervjuet med amerikanske Matilda (14) om presidentvalet: – Dess meir eg tenkjer på det, dess reddare vert eg
Foto: Gage Skidmore/Flickr/CC BY-SA 2.0 / Privat
