Vekas viktigaste: Våpenkvile i Iran og historisk romferd

Våpenkvile mellom Iran og USA

Iran og USA blei natt til onsdag einige om ei vilkårsbunden våpenkvile i to veker skriv BBC. I dei to vekene kan skip reise gjennom Hormuzsundet. Sundet er viktig for verdas oljetransport.

Israel og USA har angripe Iran og Libanon i fleire veker. Våpenkvila blei annonsert berre timar etter president Donald Trump trua med at «ein heil sivilisasjon vil døy i natt» om Iran ikkje opna sundet.

Trass våpenkvila har Israel gjennomført nokre av dei største angrepa mot Libanon sidan krigen begynte. Israel hevdar avtalen ikkje gjeld Libanon.

Som svar har libanesiske Hizbollah sendt rakettar mot Israel. Hizbollah har tette band til Iran.

Raudt-politikar sende truande meldingar

Raudt-politikar Mímir Kristjánsson blei førre veke meld for å sende truande meldingar til ein mann i 60-åra, skriv Aftenposten.

Kristjánsson seier han sende meldingane medan han var full på ferie i Spania. Dei skal ha blitt sende etter at personen mellom anna hadde kalla han «ynkeleg» i eit kommentarfelt. Kristjánsson trua med å banke personen.

Kristjánsson har fått ein reprimande av Raudt. Partisekretær Reidar Strisland seier til VG at meldingane var heilt uakseptable, men partiet vil ikkje ekskludere stortingspolitikaren.

Politiet har no lagt bort saka. Det gjer dei mellom anna fordi den fornærma ikkje ønskte at dei skulle gå vidare med saka.

– Sjølv om saka er lagt bort, betyr det ikkje at eg ikkje har gjort noko gale. Eg kjem framleis til å ta tak i meg sjølv og mi eiga åtferd framover, og er framleis djupt skamfull over det eg har gjort, seier Kristjánsson til Dagbladet.

Stor rettssak mot terrormistenkte i Nigeria

Tysdag denne veka starta det ei rettssak i Nigeria, der meir enn 500 menneske er skulda for å vere involverte i militante angrep, skriv BBC.

Dei mistenkte er skulda for å medverke til terror, særleg nordaust i landet, der gruppa Boko Haram starta eit opprør for 17 år sidan.

Så langt i år har fleire hundre menneske i Nigeria mista livet under angrep frå militante grupper.

Internasjonale observatørar er til stades i retten.

Lyspunkt: «Baby-korallar» kan gi håp til Great Barrier Reef

Forskarar har samarbeidd med fleire selskap for å gro 40 000 baby-korallar, som har blitt sette ut i korallrevet Great Barrier Reef i Australia. Det skriv australske ABC.

Korallane blei grodd på land, eller samla frå ville korallegg og larvar, og blei monterte på spesiallaga verktøy for å plante korallane.

Arbeidet er ein del av eit tre år langt program som skal forsøke å gjenreise korallbestanden i Great Barrier Reef.