Vekas viktigaste: Arrestert eksprins, Gaza-dødstal og rekordolympiar

Eksprins Andrew er arrestert av britisk politi

Andrew Mountbatten-Windsor er sikta for å ha misbrukt stillinga si då han var ein offentleg tenesteperson. Politiet arresterte han torsdag på Sandringham, der han skulle feire 66-årsdagen sin, skriv TV 2.

Den tidlegare prinsen er mistenkt for å ha delt informasjon med overgrepsdømde Jeffrey Epstein då han var handelsrepresentant for Storbritannia.

I tillegg har han dukka opp fleire stader i Epstein-dokumenta knytt til seksualbrotsverk. Den tidlegare prinsen mista tittelen sin i fjor på grunn av desse koplingane, og skuldingar om overgrep mot då mindreårige Virginia Guiffre.

Kong Charles har sagt at kongefamilien samarbeider med og støttar etterforskinga. Mountbatten-Windsor vart lauslaten torsdag kveld, men blir framleis etterforska, ifølgje NRK.

Skyting i Bergen

Onsdag forskansa ein mann seg i eit hus nord i Bergen og fyrte av fleire skot mot politiet, skriv VG. Politiet fekk beskjed om dei første skota rundt klokka 9.

Folk i området vart bedne om å halde seg inne, inkludert ein skule. Politiet forsøkte å kome i dialog med mannen gjennom dagen, men fleire skot vart fyrte av.

Då mannen på nytt skaut mot politiet i 20-tida, gjekk dei inn med sprengvåpen og gass for å pågripe han. Huset han forskansa seg i tok fyr, og er no brent ned.

Mannen vart køyrd til sjukehuset etter at han vart arrestert. Han er sikta for grove trugslar med våpen. Det er ikkje rapportert nokon skadde frå hendinga.

Peru får sin åttande president i løpet av åtte år

Den fungerande presidenten av Peru, José Jerí, vart avsett etter berre fire månader i vervet, ifølgje BBC.

Jerí måtte gå på grunn av ein skandale knytt til fleire møte med ein kinesisk handelsmann utanom jobbtida.

José Balcázar er vald inn som president av nasjonalforsamlinga og blir den åttande presidenten på like mange år, ifølgje NTB. Seks av dei tidlegare presidentane har gått av eller blitt avsette på grunn av korrupsjon, kuppforsøk eller demonstrasjonar.