Vekas viktigaste: Fredsprisutdeling, smuglarballongar i Litauen og barnehageåtak i Sudan

Kampar på grensa mellom Thailand og Kambodsja

Seks veker etter at landa signerte ein fredsavtale, var det måndag igjen åtak på grensa mellom Thailand og Kambodsja.

NRK skriv at Thailand gjennomførte luftåtak langs grensa, og fleire hundre tusen har dei siste dagane blitt evakuerte på begge sider av grensa. Dei to landa skuldar kvarandre for å ha brote avtalen om våpenkvile, som vart framforhandla av USA og signert i oktober. Grensestriden har vart i over hundre år.

Thailands statsminister Anutin Charnvirakul seier det ikkje blir nye forhandlingar og at Kambodsja må lyde dei for å få slutt på kampane.

Kambodsja ber FNs sikkerheitsråd om å gripe inn, melder NTB.

Over hundre personar drepne i barnehageåtak i Sudan

Måndag melde Verdas helseorganisasjon (WHO) at 114 personar blei drepne i eit åtak på ein barnehage og eit sjukehus i Sudan 4. desember. 63 av dei drepne var barn, opplyser FN.

Ifølgje NRK vart barnehagen først angripen med missil frå dronar. Då foreldre og helsearbeidarar kom til staden, blei dei også angripne.

BBC skriv at at den paramilitære gruppa The Rapid Support Forces (RSF) blir skulda for å stå bak åtaket, men dei har førebels ikkje tatt på seg ansvaret.

Barnehagen ligg i byen Kalogi i regionen Kordofan, som no er sentrum for kampane i krigen. RSF melder denne veka at dei har tatt kontroll over landets største oljefelt, som ligg sør i Kordofan.

Lyspunkt: Mobbetala går ned

Færre elevar opplever mobbing i skulen, og fleire er motiverte. Det kjem fram i Elevundersøkinga.

– Dette er utruleg gode nyheiter. Etter fleire år med aukande mobbetal, ser vi no ein tydeleg nedgang på alle trinn, seier kunnskapsminister Kari Nessa Nordtun (Ap) i ei pressemelding frå regjeringa.

Ho understrekar at det framleis er altfor mange som blir mobba, og at vi må halde fram arbeidet for betre, trygge og gode skulemiljø.