Miljøorganisasjonar får ikkje medhald i klimasøksmålet i EMD – siger for staten
Greenpeace og Natur og Ungdom får ikkje medhald av Den europeiske menneskerettsdomstolen (EMD) i det såkalla klimasøksmålet.
Dei to miljøorganisasjonane håpa å få norsk oljepolitikk dømt i strid med Den europeiske menneskerettskonvensjonen (EMK). Dei fekk styrkt håpet då EMD i april 2024 dømde Sveits for brot på menneskerettane for ikkje å ha verna innbyggjarane sine frå farlege klimaendringar.
Greenpeace og Natur og Ungdom bad domstolen slå fast at statar er ansvarlege for klimautslepp som følgje av olje- og gassutvinning. Saka stammar frå 2016: Miljøorganisasjonane meiner at det strir mot grunnleggjande menneskerettar å opne for norsk oljeboring i Barentshavet under ei klimakrise.
I dei norske domstolane fekk dei ikkje medhald, men etter eit nederlag i Høgsterett i 2020 valde dei å klage det vidare til EMD.
Også EMDs rettsavgjerd har likevel stilt seg på staten si side. Dei dømmer at det ikkje er brot på EMKs artikkel 8 (rett til respekt for privat- og familieliv), artikkel 13 (rett til eit effektivt rettsmiddel) eller artikkel 14 (forbod mot diskriminering).
Miljøorganisasjonane har likevel gått til eit nytt klimasøksmål mot staten, for å ha godkjent oljefelta Tyrving, Yggdrasil og Breidablikk utan å greie ut dei globale klimaverknadene. Oslo tingrett har gitt dei medhald, men staten anka dommen. Saka gjekk i Borgarting lagmannsrett i august-september.
Rett24 hadde saka først.
