Synne Vo får dialektpris
Artisten frå Lesja får Norsk Målungdom sin dialektpris.

– Synne Vo har blitt populær dei siste åra med fengande låtar på gudbrandsdøl. Ho lagar musikk som treffer unge og er med på å assosiere innlandsdialekt med popkultur og nyskaping, uttalar leiar i Norsk Målungdom Sebastian Vinsent Natvik i ei pressemelding.
Synne Vorkinn, kjent under artistnamnet Synne Vo, får Dialektprisen for 2024 under landsmøtet til Norsk Målungdom. Dei deler kvart år ut pris til eit dialektførebilete for unge.
Synne Vo gav i fjor ut debutalbumet Kanskje det går te helvete. Tidlegare i år fekk ho mykje merksemd for låten Du ska få en dag i mårgå, som er ein versjon av Alf Prøysen sin folkekjære song.
Målungdommen synest det er stas å kunne gje prisen til eit ungt førebilete som er på veg opp.
– Musikk er ein utruleg viktig kanal for å formidle kultur og identitet, og dette gjer Synne på strålande vis ved å kombinere det bygdenostalgiske og heimekjære med ei universell oppleving av å vere ung og svolten på livet, meiner Natvik.
Vinnarar av Dialektprisen:
2023: Odd Nordstoga og Ingebjørg Bratland, artistar
2022: Karsten Warholm, friidrettsutøvar
2021: Kjartan Lauritzen, artist
2020: Victor Sotberg, YouTubar og programleiar
2019: Helsesista (Tale Maria Krohn Engvik), SoMe-personlegdom
2018: Lothepus (Leif Einar Lothe), TV-kjendis
2017: Silje Nordnes, Markus Neby og Ronny Brede Aase for P3morgen
2016: Josefine Frida Pettersen, skodespelar
2015: Daniel Kvammen, artist
2014: NRK og TV2 sitt VM-studio under fotball-VM 2014
2013: Tønes, artist
2012: Harald Rønneberg, programleiar
2011: Therese Johaug, skiløpar
2010: Lars Vaular, artist
2009: Eli Kari Gjengedal, vêrmeldar
2008: Linda Eide, morokvinne på fjernsyn
2007: Ingrid Bolsø Berdal, skodespelar
2006: Hopalong Knut, rockgruppe
2005: Are og Odin, moromenn på radio
2004: Ravi, artist
2003: Filmen United v/Magnus Martens, regissør
2001: Tungtvann, hiphopgruppe
Kjelde: Norsk Målungdom