Bur du i «Årets nynorskkommune»?
No kan du nominere din kommune, om du meiner den er best i Noreg på å ta vare på nynorsken.
Om du er nøgd med nynorskarbeidet i kommunen eller fylkeskommunen din, kan du no føreslå den som kandidat til prisen «Årets nynorskkommune 2026», skriv Språkrådet på sidene sine. Prisen er på 200 000 kroner.
Prisen blir delt ut annakvart år. Førre gong var det Kvam herad som stakk av med prisen, mellom anna på grunn av arbeidet deira for at innvandrarar skal få opplæring i og på nynorsk.
I år skriv Språkrådet at juryen vil leggje vekt på arbeidet dei nominerte gjer med lesing og litteratur.
– Eg trur alle språkinteresserte gler seg over merksemda rundt lesing og leselyst for tida, skriv avdelingsdirektør i Språkrådet, Marianne Aasgaard, på sidene til Språkrådet.
Kommunane og fylkeskommunane har store oppgåver på dette feltet, og juryen ønskjer å gjere lesing, leselyst og tilbodet på nynorsk synleg i årets utdeling, skriv Aasgaard.
– Bra og viktig
– Markeringa av årets nynorskkommune er utruleg bra og viktig, skriv Sebastian Vinsent Natvik, leiar i Norsk Målungdom, på e-post til Framtida.
– Når eg er i Oslo med gåavstand til dei som driv med stortingspolitikk, kan ein fort gløyme dei som driv med lokalpolitikk og har direkte kontakt med både yngre og eldre nynorskbrukarar. Og ikkje minst er det kommunen som ofte skal få den nasjonalt vedtekne politikken ut i verda, skriv Natvik.
Natvik har klare kriterium til at ein kommune skal fortene utmerkinga som årets nynorskkommune:
- Nynorsken ligg i bakhovudet i politikken og i føringar til anbodsprosessar. Dersom kommunen til dømes skal kjøpe eit nytt datasystem, bør ein legge vekt på at det er tilgjengeleg på nynorsk.
- Kommunen har ein heilskapleg nynorsk profil, og er stolte av å vise han fram.
- Det er eit tydeleg ønske om å halde på nynorskelevane, og engasjementet for skuleelevane må komme til uttrykk både i god opplæring og i eit fritidstilbod som gjer det kjekt å vakse opp der dei bur. Politikk som ikkje oppmodar til sentralisering og fråflytting, er god nynorskpolitikk, slår Natvik fast.
- Til slutt meiner Natvik det er «100 prosent stryk i boka» viss kommunedirektøren har så mykje som føreslått å skrote nynorsk for å spare pengar.
Heiar på heimkommunen
Målungdomsleiaren har ingen tydeleg førehandsfavoritt, men held ein knapp på heimkommunen Alver.
– Det er ein utruleg sterk kandidat, og eg veit at kommuneleiinga ikkje er i tvil om at det er nynorsken først! skriv han.
Det som talar mot, ifølge Natvik, er at det har vore mykje snakk om skulenedleggingar i den siste tida, og det går utover tilbodet for elevane utanfor kommunesenteret.
– Det kan ha visse konsekvensar for nynorsken i det lange laupet når dei kuttar i tilbod. Likevel har dei ein veldig god språkbruksplan og arrangerer nynorskdagane kvart år med gode tilskipingar for små og store! avsluttar han.
Det er representantar frå Språkrådet, Nynorsk kultursentrum, Landssamanslutninga av nynorskkommunar, Noregs Mållag og KS som sit i juryen. Marianne Aasgaard leier juryarbeidet på vegner av Kultur- og likestillingsdepartementet.
Fristen for å føreslå kommunar og fylkeskommunar er 3. august 2026.
Tidlegare vinnarar:
2024: Kvam herad
2022: Vestland fylkeskommune
2021: Ål
2020: Voss herad
2019: Ålesund
2018: Vinje
2017: Sveio
2016: Time
2015: Førde
2014: Radøy
2013: Ørsta
2012: Sogn og Fjordane
2011: Fjell
2010: Seljord
2009: Stord
Kjelde: Språkrådet
