Vekas viktigaste: Stortinget seier unnskyld og Trump er tilbake

Stortinget beklagar fornorskingspolitikken

Innstillinga om rapporten til sannings- og forsoningskommisjonen kom tysdag 5. november. Kommisjonen har granska fornorskingspolitikk og urett overfor samar, kvener/norskfinnar og skogfinnar.

Stortingsfleirtalet gir si «djupaste orsaking for dei overgrep fornorskingspolitikken innebar», skriv NTB.

– Med dette ber Stortinget om unnskyldning for tidlegare stortings aktive rolle i fornorskingspolitikken, og erkjenner ansvar for konsekvensane av denne politikken for grupper og enkeltindivid, skriv kontroll- og konstitusjonskomiteen på Stortinget i innstillinga si i saka.

Alle partia i kontrollkomiteen, med unntak av Frp, stiller seg bak denne formuleringa.

Rettssak mot Frosta-legen

Denne veka starta rettssaka mot tidlegare kommuneoverlege i Frosta, Arne Bye. Han er tiltalt for valdtekt av 87 pasientar, og for å ha misbrukt stillinga si for seksuell omgang med 94 kvinner.

Det er sett av 16 veker i Trøndelag tingrett i Steinkjer. Denne veka har legen forklart seg i retten.

Legen har erkjent straffskuld for tre valdtekter og 35 tilfelle av misbruk av stilling, skriv NRK. Han skal ha brukt ulike gjenstandar på kvinnene i dei tre tilfella av valdtekt han erkjenner straffskuld for.

Legen har òg filma gynekologiske undersøkingar med opptil tolv kamera. Politiet har funne 47 000 videofiler. Bye forklarar i retten at han filma undersøkingane for å beskytte seg mot klager.

Lyspunkt: HPV-heimetest tilgjengeleg i heile landet

Heimetestar for livmorhalskreft er eit tiltak for å redusere talet på tilfelle av livmorhalskreft, skriv Folkehelseinstituttet (FHI) på nettsidene sine.

Heimetesten er no tilgjengeleg hos alle fastlegar i Noreg.

Heimetesten er eit alternativ til kvinner som av ulike grunnar ikkje deltek i Livmorhalsprogrammet gjennom vanlege livmorhalsprøver. No blir det sendt ut informasjon om tilbodet om heimetest til kvinner som ikkje har sjekka seg på ti år eller meir, opplyser FHI. Andre kan òg snakke med fastlegen sin om å ta heimetest.