Vekas viktigaste: Naturtap, statsbudsjett og skjerpa trusselnivå

Statsbudsjettet legg opp til rekordhøg oljepengebruk

Denne veka la regjeringa fram forslag til statsbudsjett for 2025.

Statsbudsjettet er på svimlande 2020,8 milliardar kroner.

Budsjettet legg opp til å bruka 460, 1 milliardar kroner frå Oljefondet, noko som svarar til 2,5 prosent av verdien på fondet. Sidan fondet har auka kraftig i verdi, betyr dette at det er rekordhøg oljepengebruk, sjølv om politikarane held seg innafor handlingsregelen som er på 3 prosent.

Unge Venstre og FpU er blant ungdomspartia som trilla terning på statsbudsjettet og kritiserer den høge pengebruken.

– Oljepengebruken er altfor stor, eg synest ikkje regjeringa tek innover seg at framtidige generasjonar skal dra nytte av oljefondet, sa FpU-leiar Simen Velle til Framtida.no.

Les kva statsbudsjettet betyr for deg som ung!

PST hevar trusselnivået i Noreg

Tysdag heva Politiets tryggingsteneste (PST) trusselnivået frå moderat til høgt, som er det nest høgaste nivået.

Det er først og fremst trusselen mot jødiske og israelske mål som er skjerpa.

Politiet innfører midlertidig nasjonal væpning som følgje av det auka trusselnivået.

Assisterande sjef i PST Inga Bejer Engh sa på ein pressekonferanse at det er ein uavklart situasjon, som er i stadig utvikling.

– Me har i dag ingen informasjon om konkrete planar om terror i Noreg, men me jobbar fortløpande med å avklara truslar og usikkerheitsfaktorane som me må vera ærleg og seia at me står i, sa ho ifølgje NRK.

Aktiviteten frå ekstreme islamistar har auka i Europa, noko som vert forklart med Israel si krigføring i Midtausten.

Israel skal ha skote mot FN-styrkar

Onsdag rapporterte FN sin fredsbevarande styrke i Libanon (UNIFIL) at israelske styrkar har skote mot dei.

To av deira soldatar er skadde etter å ha falle ned frå eit vakttårn, som vart skote mot av ei israelsk stridsvogn. Skadane var ikkje alvorlege, men resulterte i sjukehusinnlegging.

Det israelske forsvaret (IDF) har òg skote i stykke overvakingskamera og mot ein bunker der FN-soldatar søkte tilflukt, og det har vorte observert ein israelsk drone inne på ein FN base.

UNIFIL er svært bekymra og vil følgja opp hendingane med det israelske forsvaret.

Vekas lyspunkt: Første kvinnelege NHL-trenar

Kanadiske Jessica Campbell (32) skreiv denne veka historie då ho debuterte som assistenttrenar for ishockeylaget Seattle Kraken.

Hovudtrenar Dan Bylsma sa til The Athletic, sitert i NRK:

– Me kjem til å sjå ei kvinne bak benken for første gang i NHL og det er monumentalt. Men målet var å få tak i den beste trenaren – og det viste seg å vera Jessica Campbell.