Sp vil opprette «ungdomshus» for kriminelle
Justisministeren og barneministeren foreslår å plassere barn under 15 år som gjer seg skuldig i gjenteken kriminalitet på ein ny type institusjon for ungdomskriminelle.
Senterpartiet er måndag samla til landsstyremøte, der eit av hovudtemaa er «eit krafttak for å førebyggje ungdomskriminalitet og utanforskap».
I debatten deltek både Mehl og barneminister Kjersti Toppe. Sistnemnde seier at det kan vere behov for lukka institusjonar for denne gruppa.
– Vi må vurdere kor langt det skal gå. Men det viktigaste er at det i dag ikkje finst noko tilbod der dei blir varetekne, seier ho.
– Senterpartiet vil etablere tryggingshus for ungdom som eit nytt tilbod, der ulike aktørar rundt barnet skal samarbeide om eit spesialtilpassa omsorgs- og oppfølgingstilbod. Institusjons- og butilbod i barnevernet må vere tilgjengeleg for barn i heile landet, heiter det i forslaget som skal behandlast på landsstyremøtet.
