Bangladesh: Kuttar ein skuledag for å spare straum
I Bangladesh er skulane vanlegvis opne seks dagar i veka. No kuttar styresmaktene éin dag for å spare utgifter.
Denne artikkelen er eldre enn 1 år gamal. Det betyr at noko av informasjonen kan vere utdatert.
Vanlegvis har skuleelevar i Bangladesh fri på fredagar, men no stengjer styresmaktene skuledørene også på laurdagar.
Dei lyt nemleg spare straum.
Det melder nyheitsbyrået AP News.
Kuttar i opningstidene
Bangladesh importerer mykje gass, noko som har vorte dyrare etter Russland gjekk til krig mot Ukraina. Tidlegare i år stengde landet 10 av kraftstasjonane som går på diesel, og i juli steig drivstoffprisane med over 50 prosent.
Det har ført til at befolkninga dei siste månadane har opplevd stadig fleire straumbrot.
For å kutte i straumforbruket innførte styresmaktene frå juli av ein nasjonal straumstopp to timar kvar dag. No skal skulane halde stengt ein dag ekstra, og i tillegg vert opningstidene til offentlege kontor og bankar korta ned med ein time kvar dag.
Illustrasjonsfoto: Pixabay
