Verdas eldste person fekk Cola i bursdagsgåve
Denne artikkelen er eldre enn 1 år gamal. Det betyr at noko av informasjonen kan vere utdatert.
Verdas eldste person heiter Kane Tanaka. På søndag hadde ho bursdag, og då vart ho 119 år gamal.
Ifølgje The Japan Times er målet hennar å verte minst 120 år gamal.
Tanaka vart fødd i 1903 i Japan, og bur i dag på ein eldreheim i byen Fukuoka. Der likar ho mellom anna å utfordre seg sjølv ved å løyse tal-gåter, melder avisa.
Fekk Cola til bursdagen
Kane Tanaka er også veldig glad i brus og sjokolade, og til bursdagen fekk ho difor to Coca Cola-flasker der det stod «gratulerer med dagen» på etiketten, samt namnet og alderen hennar.
– Eg håpar ho held fram med å vere frisk og ha det moro kvar dag som ho vert eldre, fortalde barnebarnet hennar Eiji Tanaka (62), ifølgje The Japan Times.
I tillegg til å vere verdas eldste nolevande person, er Tanaka den eldste personen i Japan noko sinne. På verdsbasis har 119-åringen endå nokre år att før ho kaprar rekorden, for franske Jeanne Calmet skal ha vorte heile 122 år før ho døydde i 1997.
Den eldste nordmannen noko sinne skal ha vore Maren Bolette Torp frå Oslo. Ho rekte å fylle 112 år og 61 dagar før ho døydde i 1989.
Tenåringen Zara Rutherford har sett seg eit mål – ho vil bli den yngste kvinna som nokon gong har floge rundt jorda åleine. Skjermdump: Instagram / fly.zolo
