– Veldig viktig klimaprosjekt
Forskarar frå Nansensenteret reiser no langt inn i isen i Arktis. Med seg på isbrytarbåten Le Commandant Charcot har dei med seg båtane elevane har dekorert.
– Dette er eit veldig viktig klimaprosjekt om klimaforskning, seier Alma Rocio Posserud Glenjen (11).
Bilete til venstre: Thea (11) viser fram båten ho har laga saman med Emilie (11), Alma (11) og Tuva (11).
Bilete til høgre: Elevane fortel at dei teikna fritt på den eine sidan av båten, medan dei teikna logoen til Klimaklubben på den andre sida. Foto: VilVite
Om nokre veker skal trebåtane plasserast på eit stort isflak, saman med ein GPS-sendar som viser plasseringa. Isen smeltar medan den driv, og derfor kjem båtane etter kvart til å flyta ut på havet. Då er båtane ikkje lenger mogeleg å spora, men nokre av dei kan plutseleg dukka opp ein plass langt vekke.
– Målet med forskninga er i første rekkje å finna ut korleis isen driv og sjå kva område den er innom. Sidan isen blir tynnare på grunn av oppvarminga i havet, vil den driva fortare. Me samanliknar med tidlegare innsamla data, for å sjekka om farten har auka, seier Kjetil Lygre.
Han er forskar ved Nansensenteret og jobbar med trebåt-forskninga, som har fått namnet «Float your boat». Prosjektet har pågått sidan 2015, og sidan oppstarten har barn frå både Noreg og USA dekorert båtar som vert sendt ut.
I fjor sette forskarane frå Nansensenteret ut 400 trebåtar i Arktis nord for Svalbard ved hjelp av den norske isbrytaren KV Svalbard. Skjermdump: Youtube/Nansen Environmental and Remote Sensing Center
Forskarane ved Nansensenteret synest det er kjekt at elevane frå Klimaklubben i Bergen har bidratt.
– Me tenkte at dette var noko barn ville lika å vera med på, sidan det er ei aktiv og praktisk tilnærming til forskning. Dette kan jo bli litt spennande, sidan me har ei nettside der elevane kan følga med på kvar isflaket flyt, seier Lygre.
