Ny studie: Kommentatorspråket er «raseskeivt»
Denne artikkelen er eldre enn 1 år gamal. Det betyr at noko av informasjonen kan vere utdatert.
Studien er utført av det danske forskingsfirmaet RunRepeat i samarbeid med PFA (fagforeininga for fotballspelarar i Storbritannia).
Den danske studien såg nærare på 80 fotballkampar i toppdivisjonane i England, Italia, Spania og Frankrike. Dei analyserte 2073 utsegner frå kringkastarar i land som England, USA og Canada.
– For å møte den reelle verknaden av strukturell rasisme må vi erkjenne og ta for oss rasemessige skeivskapar. Denne studien viser ein tydeleg skeivskap i korleis vi omtalar evnene til fotballspelarar basert på hudfargen deira, seier Jason Lee i PFA.
- Les også: 6 ting eg har lært av rasismeoppgjeret
Omtale av intelligens
Eitt av hovudfunna handlar om måten europeiske fotballkommentatorar omtalar intelligensen til spelarane.
Når ein spelar får ros for intelligensen sin, fell rosen til kvite fotballspelarar i 63 prosent av tilfella, hevda studien. På den andre sida var 63 prosent av kritikken mot intelligensen til spelarar retta mot mørkhuda spelarar.
– Kommentatorar er med på å forme oppfatninga vår av kvar enkelt spelar, seier Lee.
Funna fortel òg at kommentatorane var om lag sju gonger meir sannsynleg til å snakke om ein mørkhuda spelar i samband med styrke, og tre gonger meir sannsynleg å omtale ein mørk spelar som rask.
Ønskjer medvit
PFA ønskjer at medieorganisasjonar skal gi opplæring om umedvitne raseskeivskapar til medarbeidarane sine.
– Når du speler fotball, og nokon målar eit bilete av deg som mektig, rask og aggressiv, og seier at det er gode eigenskapar å ha – men samtidig seier at du ikkje er flittig, intelligent og kreativ, er ikkje det den rette terminologien å bruke, seier Lee.
– Viss du held fram med å stigmatisere folk på denne måten, korleis skal denne idrettsutøvaren gå frå fotballbanen til å bli teken seriøst som trenar, manager eller vere i ein annan maktposisjon? spør Lee.
Les også: Likestilling i idretten: – Det finst eigentleg ikkje
Emilie Kruse Johansen (20) meiner løn og speletider er viktigare enn regelverket under kamp, for å sikra likestilling i idretten. Foto: Fredrik Hagen, Norges Ishockeyforbund.
