Yrket mitt: Magne (21) er servitør

– Eg hadde ikkje dei største forventningane til servitøryrket då eg starta med det. Men det er så mykje meir og betre enn det ein høyrer utanfrå, fortel Magne Andreas Gaut på e-post til Framtida.no.

To fluger i ein smekk

– Eg har valt denne yrkesvegen fordi eg synest det er veldig spennande å jobbe med mat og menneske. Og med dette yrket får eg begge deler, fortel Gaut og held fram:

– Vinkelner-delen starta mest som ein hobby, men vart fort med meg vidare i arbeidslivet og er no ein stor del av det eg gjer på jobb.

21-åringen tok fagbrev i servitørfaget i 2018 og har også eit vinkelner-studie å skilte med. Yrkesfaglinja i servitørfaget består av to år i skulen, først VG1 Restaurant- og matfag, VG2 Kokk- og servitørfag, og til sist to år med opplæring i bedrift.

– Førebudde utdanninga deg på yrket?

– Utdanninga er jo samkøyrd med kokkeutdanninga. Dette gjer jo at ein får prøvd mykje forskjellig. Så den førebudde meg absolutt på det som var mogeleg å førebu meg på, med god praktisk erfaring både frå restaurant på skulen og med utplasseringsperiodar i bedrifter. Og ein bit med teoretisk kunnskap om mat, vin og det å jobbe i restaurant.

Magne Andreas Gaut arbeider på den prisløna restauranten To rom og Kjøkken i Trondheim. Foto: To rom og Kjøkken.

Det lille ekstra smilet

– Kort oppsummert: Korleis ser ein vanleg arbeidsdag ut?

– Ein vanleg arbeidsdag er innhaldsrik og spennande. Du veit aldri heilt kva gjester du møter før dei står i døra, fortel Gaut.

Han forklarar at ein opnar restauranten ein liten time før gjestane kjem med ein god «Mise en Place» – som på godt norsk tyder at alt må vere klart, slik at han ikkje treng springe rundt for å leite etter ting i løpet av kvelden.

– Når gjestene kjem tek ein dei fint imot, set dei ved bordet og byr på seg sjølv for at dei skal få den beste opplevinga. Anbefalar mat og drikke, let dei nyte tida og stenger restauranten når siste gjest har gått ut døra.

Når siste gjest har takka for seg for kvelden, då lyt Gaut gjere klart til neste dag og nye gjester.

– Kva er det beste med jobben?

– Det beste med jobben er folka. Alle dei spennande menneska ein jobbar med og gjestene ein møter og knyt band med ved god service. Og dei ein får det lille ekstra smilet frå når dei går ut døra som gjer at du veit at dei har hatt ei heilt fantastisk restaurantoppleving.

– Kva er det mest utfordrande?

– Det er fleire utfordringar, men den mest krevjande for meg er nok minnet. Heldigvis har vi penn og papir i lomma.

• Det mest utfordrande for tannlegen Signe (31) er å behandle pasientar med sterk tannlegeangst: – Den aller største gleda me kan oppleva i vår jobb, er når me klarer å hjelpa desse pasientane

Måtte bryte opp matkrig i restauranten

– Kven passar yrket for?

– Yrket passar for dei som likar å jobbe med mat, men også vil treffe gjestene for å sjå reaksjonane deira på det dei får servert. Ein treng å vere litt utettervend og glad i å møte folk. Lærevillige og nysgjerrige på ulike drikkevarer og matvarer.

– Har du tips til ungdom som siktar mot denne jobben?

– Mitt beste tips er å konkurrere innanfor yrket så mykje de får til. Dette er ekstremt lærerikt fram mot både eksamen på skulen og fagbrevet. Det har lært meg masse nyttig, og ikkje minst gjeve meg mange gode venner og kontaktar i restaurant- og hotellbransjen.

– Kva er det mest utrulege som har hendt deg på jobb?

– Det er fleire historier, men det mest utrulege er framleis noko eg opplevde som lærling då eg hadde eit selskap på godt vaksne folk. Dei fekk servert ost med kompott og knekkebrød som nest siste rett. Dette begynte dei å kaste over på naboselskapet og starta ein liten matkrig som vi måtte løyse opp.

• Brenn du for god mat, og trur kokk kan vere yrket for deg? Les om kvardagen som «Kokkejævel»: – Eit kjøken kan ikkje fyllast opp av mange talent som alle ynskjer å verte kjøkensjef.

Asbjørn Sandøy. Foto: Kjærast